काठमाडौँ । ललितपुरको पुल्चोकस्थित राष्ट्रिय मानव अधिकार आयोग अगाडि लघुवित्त तथा सहकारी पीडितहरूले सडकमा सुतेर धर्ना दिएका छन्। आफ्ना माग सम्बोधन गर्न सरकार वार्तामा नआएसम्म आन्दोलनस्थलबाट नहट्ने अडान लिँदै उनीहरूले आयोगको गेटअगाडि नै रात बिताएका हुन्।

आन्दोलनरत पीडितहरूलाई सुरक्षित तथा व्यवस्थित स्थानमा बस्न आग्रह गर्दै काठमाडौँका डीएसपी र ललितपुरका एसएसपीसहितको सुरक्षा टोली घटनास्थलमा परिचालन गरिएको छ। सुरक्षाकर्मीले आन्दोलनरत पक्षसँग वार्ता गरी उनीहरूलाई सडकबाट हटाउने प्रयास गरिरहेको जनाइएको छ।

राष्ट्र, राष्ट्रियता, धर्म, संस्कृति र नागरिक बचाउ महाअभियानको अगुवाइमा मधेसका विभिन्न जिल्लाबाट २३ दिन पैदलयात्रा गरेर उनीहरू बिहीबार काठमाडौँको कलंकी आइपुगेका थिए। त्यसपछि शुक्रबार साँझ पुल्चोकस्थित राष्ट्रिय मानव अधिकार आयोग परिसरमा धर्ना सुरु गरेका हुन्।

लघुवित्त तथा सहकारी संस्थाबाट लिएको ऋण तिर्न नसक्दा आफूहरू आर्थिक तथा सामाजिक समस्यामा परेको भन्दै पीडितहरूले सरकारसँग तत्काल समाधान खोज्न माग गरेका छन्। उनीहरूले आफूहरूले जीवनयापनका लागि ऋण लिएको तर बढ्दो आर्थिक भारका कारण ऋण तिर्न नसक्ने अवस्थामा पुगेको बताएका छन्।

आन्दोलनरत पक्षले सरकारको तर्फबाट औपचारिक रूपमा वार्ताका लागि प्रतिनिधि नआएसम्म धर्ना नछाड्ने जनाएको छ। उनीहरूले ऋण तथा असुली प्रक्रियासँग जोडिएका समस्या समाधान, पीडितको अवस्था सम्बोधन र राहतका लागि सरकार गम्भीर बन्नुपर्ने माग गरेका छन्।

लघुवित्त तथा सहकारी क्षेत्रका पीडितहरू लामो समयदेखि ऋण असुली, ब्याज, कालोसूची तथा धितोसम्बन्धी समस्याविरुद्ध आन्दोलन गर्दै आएका छन्। पछिल्लो धर्नाले भने उनीहरूको आन्दोलन राजधानीको केन्द्रसम्म आइपुगेको देखाएको छ।

Originally published on abcnews.com.np.