काठमाडौँ । अविरल वर्षासँगै आएको बाढी, पहिरो तथा सडक कटानका कारण देशका विभिन्न स्थानमा सडक यातायात प्रभावित भएको छ। प्रहरी प्रधानकार्यालयले शनिबार बिहान ६ः३० बजेसम्मको विवरण सार्वजनिक गर्दै विभिन्न जिल्लाका सडकखण्डमा सवारीसाधनको आवागमन रोकिएको जनाएको छ।

काभ्रेपलाञ्चोक–सिन्धुली जोड्ने बिपी राजमार्गको खुर्कोट–नेपालथोक–कटुन्जेबेँसी सडकखण्डमा सम्भावित बाढीको जोखिमलाई मध्यनजर गर्दै हरेक दिन साँझ ६ बजेदेखि बिहान ४ बजेसम्म सबै प्रकारका सवारीसाधन सञ्चालनमा रोक लगाइएको छ। उक्त सडकखण्डमा बिहान ४ बजेदेखि साँझ ६ बजेसम्म भने यातायात सञ्चालन हुने जनाइएको छ।

त्यस्तै, मकवानपुरको कान्ति लोकपथमा पनि वर्षाका कारण अपराह्न ५ बजेदेखि बिहान ५ बजेसम्म सबै प्रकारका सवारीसाधनको आवागमन रोकिएको छ।

यी सडकखण्ड पूर्ण रूपमा अवरुद्ध

इलाम नगरपालिका–९ राजदुवालीमा हिलोका कारण मेची राजमार्ग पूर्ण रूपमा अवरुद्ध भएको छ। उक्त स्थानमा वैकल्पिक सडकबाट आवागमन गर्न सकिने प्रहरीले जनाएको छ।

सिन्धुपाल्चोकको अरनिको राजमार्गअन्तर्गत भोटेकोशी गाउँपालिका–४, चारकिलो पहिरो–लिपिङ सडकखण्ड सडक भासिएपछि पूर्ण रूपमा बन्द भएको छ।

रसुवाको उत्तरगया गाउँपालिका–५ खाल्टेमा सडक कटान हुँदा त्रिशूली–मैलुङ–स्याफ्रुबेँसी कच्ची सडकखण्ड पनि पूर्ण रूपमा अवरुद्ध भएको छ।

भेरी करिडोर र मध्यपहाडी लोकमार्ग प्रभावित

रुकुम पश्चिमको आठबिसकोट नगरपालिका–६, रिजेगार्ड खोला नजिक पहिरो खस्दा भेरी करिडोरअन्तर्गत जाजरकोट–डोल्पा सडक पूर्ण रूपमा अवरुद्ध भएको छ।

रुकुम पूर्वको भूमे गाउँपालिका–४ काडाबगर तथा धौलापहिरामा पहिरो खसेपछि मध्यपहाडी लोकमार्ग पनि अवरुद्ध भएको प्रहरीले जनाएको छ।

रोल्पाको थबाङ गाउँपालिका–२ लाप्लेभिर र दबाङमा भूस्खलन हुँदा घोराही–थबाङ सहिद मार्ग दुई स्थानमा पूर्ण रूपमा बन्द भएको छ।

सडक खुलाउने प्रयास जारी

अवरुद्ध सडकखण्ड सञ्चालनमा ल्याउन सम्बन्धित निकाय तथा स्थानीय तहसँग समन्वय भइरहेको प्रहरीले जनाएको छ। लगातार वर्षा भइरहेकाले थप बाढी, पहिरो तथा सडक अवरोध हुनसक्ने भन्दै सवारी चालक तथा यात्रुलाई आवश्यक सतर्कता अपनाउन प्रहरीले आग्रह गरेको छ।

सडकको पछिल्लो अवस्था बुझेर मात्र यात्रा गर्न र अवरुद्ध सडकबारे जानकारी लिन सम्बन्धित प्रहरी कार्यालय तथा स्थानीय प्रशासनसँग सम्पर्क गर्नसमेत आग्रह गरिएको छ।

Originally published on abcnews.com.np.