कैलाली । सुदूरपश्चिम प्रदेशका नवनियुक्त मुख्यमन्त्री खगराज भट्टले पदभार ग्रहण गरेलगत्तै प्रदेशका अस्पतालमा डायलाइसिस सेवा विस्तार गर्ने निर्णय गरेका छन्।

शुक्रबार मुख्यमन्त्रीमा नियुक्त भट्टले पद तथा गोपनीयताको शपथ लिएर कार्यभार सम्हालेपछि बसेको पहिलो मन्त्रिपरिषद् बैठकले प्रदेशभर डायलाइसिस सेवा विस्तार गर्ने निर्णय गरेको हो। यसबाट मिर्गौला रोगी तथा नियमित डायलाइसिस आवश्यक पर्ने बिरामीलाई उपचारका लागि टाढा जानुपर्ने बाध्यता कम हुने अपेक्षा गरिएको छ।

निर्णयअनुसार सेती प्रादेशिक अस्पतालमा ५, महाकाली प्रादेशिक अस्पतालमा ४, टीकापुर प्रादेशिक अस्पतालमा ३ तथा लम्कीचुहामा ५ शय्या थप गरिनेछ। यस्तै, बयलपाटा, जोगबुडा प्रादेशिक अस्पतालसहित अन्य जिल्ला अस्पतालमा २–२ शय्या थप गर्ने योजना छ।

पूर्वसरकारकै नीति कार्यान्वयन

डायलाइसिस सेवा विस्तारसम्बन्धी निर्णय आर्थिक वर्ष २०८३/८४ को नीति तथा कार्यक्रममा समावेश विषयकै निरन्तरता हो। प्रदेश प्रमुख नजिर मियाँले प्रस्तुत गरेको नीति तथा कार्यक्रमको ४८औँ बुँदामा स्वास्थ्य सेवा विस्तारको व्यवस्था गरिएको थियो।

निवर्तमान मुख्यमन्त्री शाहले आफ्नो कार्यकालमा अघि बढाइएको स्वास्थ्य सेवा विस्तारसम्बन्धी निर्णयलाई नयाँ सरकारले पहिलो निर्णयका रूपमा कार्यान्वयनमा लगेको भन्दै खुसी व्यक्त गरेका छन्। उनले यसका लागि बजेटसमेत विनियोजन गरिएको बताएका छन्।

सामाजिक विकासमन्त्री सन्तोष शर्मा थापाले मन्त्रिपरिषद् बैठकमा डायलाइसिस सेवा विस्तारसम्बन्धी प्रस्ताव पेस गरेका थिए। मुख्यमन्त्री भट्टले उक्त प्रस्ताव स्वीकृत गरेका हुन्।

प्रदेश सरकारले पूर्वसरकारले अघि सारेको नीतिलाई निरन्तरता दिँदै स्वास्थ्य सेवा सर्वसाधारणको पहुँचमा पुर्‍याउने प्रयासस्वरूप पहिलो निर्णय नै डायलाइसिस सेवा विस्तार गर्ने गरेको हो।

Originally published on abcnews.com.np.