काठमाडौंका पाँच स्थानबाट शनिबार ग्यास बिक्री वितरण भइरहे पनि उपभोक्ताले ग्यास लिन परिचयपत्र बोकेर लामो लाइनमा बस्नुपर्ने अवस्था आएको भन्दै शाहीले आपत्ति जनाएका हुन्।

सामाजिक सञ्जालमार्फत प्रतिक्रिया दिँदै शाहीले लेखेका छन्, “ग्यास किन्न पनि अब राष्ट्रिय परिचयपत्र वा नागरिकता अनिवार्य! आज काठमाडौँका पाँच स्थानबाट ग्यास बिक्री हुँदै छ, तर ग्यास लिन पनि परिचयपत्र बोकेर लाइन बस्नुपर्ने अवस्था आयो।”

सरकारले पाँच महिनामै देशको कायापलट गरिदिन्छ भन्ने अपेक्षा नरहेको उल्लेख गर्दै उनले नागरिकले दैनिक जीवनमा भोगिरहेका आधारभूत समस्या भने समाधान गर्न सक्नुपर्ने बताए।

“सरकारले पाँचै महिनामा देशलाई कायापलट गरिदिन्छ भनेर हामीले अपेक्षा गरेका छैनौँ। तर जनताले दैनिक जीवनमा भोग्नुपर्ने आधारभूत समस्या त समाधान गर्न सक्नुपर्यो नि सरकार!” उनले भनेका छन्।

ग्यास अभावमा सरकारको ध्यानाकर्षण

शाहीले ग्यासजस्तो अत्यावश्यक वस्तु खरिद गर्नसमेत नागरिकले सास्ती खेप्नुपर्ने अवस्था आउनु गम्भीर विषय भएको बताएका छन्। उनले ग्यास वितरण प्रणालीलाई सहज बनाउन र उपभोक्तालाई अनावश्यक दुःख नदिन सरकारको ध्यानाकर्षण गराएका छन्।

एलपी ग्यासको अभाव चर्किएपछि नेपाल आयल निगमले काठमाडौंका विभिन्न पाँच स्थानबाट ग्यास वितरण थालेको छ। निगमले ग्यास खरिदका लागि उपभोक्ताले परिचयपत्र अनिवार्य रूपमा ल्याउनुपर्ने व्यवस्था गरेको छ।