रूपन्देही । लगातारको वर्षापछि गएको पहिरोमा परी रोल्पामा पाँच दिनको अवधिमा १८ जनाको मृत्यु भएको छ । गएराति लुङ्ग्री गाउँपालिका–५ धैरेनीमा पहिरोले घर पुरिँदा थप एक जनाको मृत्यु भएपछि मृतकको संख्या १८ पुगेको हो ।

जिल्ला प्रहरी कार्यालय रोल्पाका अनुसार पहिरोमा परी ७२ वर्षीया अम्मी गुरुङको मृत्यु भएको हो । घरमा सुतिरहेका बेला माथिबाट आएको पहिरोले पुरिएर उनको घटनास्थलमै मृत्यु भएको प्रहरी निरीक्षक कृष्ण श्रेष्ठले जानकारी दिए ।

यसअघि बुधबार थबाङ गाउँपालिकामा पहिरोले बस्ती बगाउँदा १३ जनाको मृत्यु भएको थियो । घटनामा एक जना अझै बेपत्ता छन् । घाइते दुई जनालाई उपचारका लागि बुटवल लगिएको छ ।

त्यस्तै, बिहीबार सुनछहरी गाउँपालिका–२ फलबाङ र गिट्ठेमा पहिरोले घर पुरिँदा चार जनाको मृत्यु भएको थियो ।

एक जना अझै बेपत्ता

थबाङमा पहिरोमा परी बेपत्ता भएका एक जनाको खोजी भइरहेको प्रहरीले जनाएको छ । घाइते दुई जनाको बुटवलमा उपचार भइरहेको छ ।

लगातारको वर्षाका कारण जिल्लाका विभिन्न स्थानमा पहिरोको जोखिम बढेको छ । जोखिमयुक्त क्षेत्रका बासिन्दालाई सुरक्षित स्थानमा सर्न प्रशासनले आग्रह गरेको छ ।

जिल्ला प्रशासन कार्यालयले पहिरो प्रभावित क्षेत्रमा राहत तथा उद्धारका लागि आवश्यक तयारी गरेको जनाएको छ । प्रहरी तथा उद्धार टोलीलाई सम्भावित विपद्का घटनामा तत्काल परिचालन हुने गरी तयारी अवस्थामा राखिएको छ ।

Originally published on abcnews.com.np.