मोरङ । जिल्ला प्रशासन कार्यालय मोरङले विराटनगरमा सञ्चालित सातवटा आँखा अस्पताल सिल गरेपछि अस्पताल सञ्चालकहरू आन्दोलनमा उत्रिएका छन् ।

आँखा अस्पताल सञ्चालनका सम्बन्धमा गुनासो आएपछि कोशी प्रदेशको स्वास्थ्य मन्त्रालय र जिल्ला प्रशासन कार्यालयको संयुक्त अनुगमन टोलीले अस्पतालहरूको निरीक्षण गरेको थियो । अनुगमनका क्रममा जनस्वास्थ्य सेवा ऐन, २०७५, जनस्वास्थ्य सेवा नियमावली, २०७७ तथा स्वास्थ्य संस्था स्थापना, सञ्चालन तथा स्तरोन्नतिसम्बन्धी मापदण्ड पूरा नगरेको पाइएपछि सिल गरिएको सहायक प्रमुख जिल्ला अधिकारी पवनराज कोइरालाले जानकारी दिए ।

प्रशासनका अनुसार केही अस्पतालले आँखा उपचारसँगै नाक, कान तथा घाँटी (ईएनटी) सेवा पनि सञ्चालन गरेको र प्राप्त अनुमतिभन्दा बढी तथा फरक प्रकृतिका सेवा दिइरहेको भेटिएको थियो । अनुगमनका क्रममा सञ्चालकहरूले मुचुल्कासमेत प्रमाणित गरेको प्रशासनको भनाइ छ । सुधारका लागि निर्देशन दिइए पनि कानुनबमोजिम प्रक्रिया अघि नबढाएपछि सिलबन्दी गरिएको प्रशासनले जनाएको छ ।

सिल गरिएका अस्पतालमा विराट आँखा अस्पताल, सञ्जीवनी आई केयर, हिमाल आँखा अस्पताल, विराट रानी आँखा अस्पताल, अखण्ड ज्योति आँखा अस्पताल, नेपाल आँखा अस्पताल र इफराह आँखा अस्पताल प्रालि रहेका छन् ।

सञ्चालकद्वारा आन्दोलन घोषणा

सिलबन्दीको विरोधमा अस्पताल सञ्चालकहरूले आइतबार विराटनगरमा पत्रकार सम्मेलन गर्दै आन्दोलन घोषणा गरेका छन् । आँखा अस्पताल संघ मोरङ तदर्थ संघर्ष समितिले प्रशासनको कदमलाई ‘आतंक सिर्जना गर्ने’ कार्य भन्दै तत्काल निर्णय सच्याउन माग गरेको छ ।

समितिका संयोजक तथा विराट आँखा अस्पतालका सञ्चालक प्रकाश दाहालले सेवामूलक तथा रोजगारमूलक व्यवसायमा गरिएको हस्तक्षेप स्वीकार्य नभएको बताए । अस्पताल तत्काल नखोले कानुनी उपचारमा जाने चेतावनी दिँदै उनले सोमबार मोरङका प्रमुख जिल्ला अधिकारी युवराज कट्टेल र कोशी प्रदेशका मुख्यमन्त्री हिक्मतकुमार कार्कीमार्फत संघ सरकारलाई ज्ञापनपत्र बुझाउने तयारी रहेको जानकारी दिए ।

प्रदेश सरकारको स्वीकृतिमाथि प्रश्न

समितिका सचिव तथा विराट आँखा अस्पतालका सञ्चालक तेजलाल कर्णले प्रदेश जनस्वास्थ्य निर्देशनालयबाट स्वीकृति लिएर सञ्चालनमा रहेका अस्पतालमा जिल्ला प्रशासनले अधिकार क्षेत्रभन्दा बाहिर गएर सिल गरेको दाबी गरे ।

‘स्वास्थ्यसम्बन्धी अधिकार प्रदेश सरकारको पनि हो,’ उनले भने, ‘हामीले प्रादेशिकस्तरमा अस्पताल सञ्चालन गर्न प्रदेशकै निकायबाट स्वीकृति लिएका छौँ । के प्रदेशले दिने सञ्चालन अनुमति कानुनविपरीत हो ?’

कर्णले विराटनगरका आँखा अस्पतालमा भारतको बिहारलगायत क्षेत्रबाट समेत बिरामी आउने गरेको बताए । अस्पताल बन्द भएको खबरले सीमावर्ती क्षेत्रमा गलत सन्देश गएको उनको भनाइ छ ।

विराट रानी आँखा अस्पतालका सञ्चालक फिरोज चौधरीले निजी क्षेत्रको ठूलो लगानी रहेको स्वास्थ्य संस्थालाई सिल गर्दा लगानी जोखिममा परेको बताए । उनका अनुसार विराटनगरमा मात्रै करिब २२ वटा आँखा अस्पताल सञ्चालनमा छन् ।

सञ्चालकहरूले अस्पताल पुनः सञ्चालनको वातावरण नबनेसम्म धर्नालगायत विरोधका कार्यक्रम जारी राख्ने बताएका छन्।

Originally published on abcnews.com.np.