पोखरा । पोखरा महानगरपालिका–५ मा व्यावसायिक प्रयोजनका लागि अवैधरूपमा उत्पादन हुँदै आएको घरेलु मदिराको ठूलो परिमाणको कच्चा पदार्थ प्रहरीले बरामद गरी नष्ट गरेको छ ।

स्वास्थ्यमा गम्भीर असर पार्ने अखाद्य वस्तु मिसाएर मदिरा उत्पादन भइरहेको सूचनाका आधारमा प्रहरीले छापा मारेको थियो ।

जिल्ला प्रहरी कार्यालय कास्कीका सूचना अधिकारी एवं डीएसपी वीरेन्द्र पासवानका अनुसार पोखरा–५ मा कोठा भाडामा लिएर बस्दै आएका वसन्त दुलामी र सपना लामिछानेले अवैध रूपमा मदिरा उत्पादन गरिरहेको फेला परेको हो ।

वडा प्रहरी कार्यालयबाट खटिएको विशेष टोलीले खानतलासी गर्दा मदिरा बनाउन प्रयोग गरिने १५ ड्रम कच्चा पदार्थ बरामद गरेको थियो । स्वास्थ्यका लागि हानिकारक देखिएको उक्त सामग्री प्रहरीले नियन्त्रणमा लिएर नष्ट गरेको जनाएको छ ।

अवैध मदिरा उत्पादनमा संलग्न दुलामी र लामिछानेलाई प्रहरीले नियन्त्रणमा लिएको छ । उनीहरूमाथि थप अनुसन्धान तथा कानुनी कारबाही प्रक्रिया अघि बढाइएको प्रहरीले जनाएको छ ।

Originally published on abcnews.com.np.