बागलुङ । पश्चिम बागलुङको बडिगाड गाउँपालिका-९ दर्लिङखोलाका आठ घर पहिरोको उच्च जोखिममा परेका छन् । दर्लिङखोलाका विभिन्न स्थानमा खसेको पहिरोले खहरे र बलघाँस गाउँका घरहरूमा असर पुर्‍याएको हो ।

वडाका विभिन्न बस्ती जोड्ने ग्रामीण सडकखण्डमा पहिरो खसेपछि १५ वटा घर जोखिममा परे पनि, आठ घर उच्च जोखिममा रहेको दर्लिङखोलाका वडाध्यक्ष कृष्ण केसीले जानकारी दिनुभयो । “निरन्तर वर्षा भइरहेकाले पहिरो खस्ने त्रास बढेको छ,” उहाँले भन्नुभयो, “खहरे र बलघाँसका १० परिवार आफन्तको घरमा आश्रय लिएर बसिरहेका छन् ।”

पहिरोले खहरे र बलघाँसका मने क्षेत्री, बक्सिङ कामी, माया विक, रामप्रसाद न्यौपाने, बासमती दमाईं, खिमे दमाईं, आनन्द केसी र सुनिता विकको घर उच्च जोखिममा परेको वडा सदस्य लालबहादुर छन्त्यालले बताउनुभयो । उहाँका अनुसार अझै केही दिन वर्षा भए वडामा ठुलो भौतिक तथा मानवीय क्षति हुने सम्भावना छ ।

विस्थापित परिवारको दुःख

पहिरोबाट विस्थापित सुनिता विकले घरमा बस्नै नसक्ने गरी क्षति पुगेपछि छिमेकीकै सहारामा रात कटाउन बाध्य भएको बताउनुभयो । उहाँको घर गत वर्ष पनि पहिरोले क्षति बनाएको थियो । “पहिरो गरिबकै घरमाथि खसिन्छ,” विकले दुखेसो व्यक्त गर्दै भन्नुभयो, “गत वर्षको पहिरोले क्षति पुर्याएको घर मर्मत गर्न नपाउँदै फेरि अर्को क्षति व्यहोर्नुपर्यो ।”

पहिरोले घरमा क्षति पुर्‍याए पनि अहिलेसम्म कुनै राहत प्राप्त नभएको विकको गुनासो छ । उहाँ सुनितासँगै बूढी सासूआमा, दुई नाबालक छोरासहित श्रीमान्को साथमा छिमेकीकै शरणमा रात बिताउन बाध्य हुनुहुन्छ । वडाध्यक्ष केसीले प्रहरी र पालिकासँग राहत तथा जोखिम न्यूनीकरणका लागि समन्वय भइरहेको बताउनुभयो ।

सडक र विद्यालयमा क्षति

पहिरोले दर्लिङखोलाका मुख्य सडक पनि अवरुद्ध भएका छन् । सडकका विभिन्न स्थानमा पहिरो खसेपछि र दर्लिङखोला घाट क्षतिग्रस्त हुँदा सवारी आवागमन ठप्प भएको छ ।

“मध्यपहाडी लोकमार्गबाट वडा नं. ९ हुँदै वडा नं. १० दर्लिङ जोड्ने सडक तथा छिपछिपे उपल्लाचौर-राखिचौर हुँदै गुल्मी जोड्ने सडक तत्काल खोल्न नसकिने गरी क्षति भएको छ,” वडाध्यक्ष केसीले भन्नुभयो, “दर्लिङखोला घाटमा ठुलो मेसिनको व्यवस्थापन गर्न समय लाग्छ ।”

पहिरोकै कारण नवजागरण प्राथमिक विद्यालयको कम्पाउन्ड पर्खालमा क्षति पुगेको छ भने बडिगाड गाउँपालिका-५ ग्वालीचौरको भिरकटेरी प्राविको पर्खाल भत्किँदा विद्यालय पनि जोखिममा परेको स्थानीय जीवन घिमिरेले जानकारी दिनुभयो । वि.सं. २०८१ साउनमा बडिगाड वडा नं. ९ दर्लिङखोला र वडा नं. १० दर्लिङमा गएको भीषण पहिरोमा मानवीय तथा करोडौँका भौतिक संरचनाको क्षति भएको थियो ।

अघिल्लो वर्ष पनि भएको थियो क्षती

गत वर्ष पनि पहिरोले सो क्षेत्रमा ठुलो क्षति ल्याएको थियो, र यस पटक फेरि जोखिम बढेपछि स्थानीयवासी चिन्तित भएका छन्। सुनिता विकले पहिरोको कारणले आफ्नो घर पुरै क्षति भएपनि अहिलेसम्म कुनै प्रकारको राहत नपाएको गुनासो गरिन् ।

जोखिम न्यूनीकरणका प्रयास

वडाध्यक्ष केसीले प्रहरी र स्थानीय सरकारसँग समन्वय गरेर यथासम्भव छिट्टै राहत उपलब्ध गराउने प्रयास भइरहेको बताउनुभयो। साथै, अवरुद्ध सडक खोल्न आवश्यक पर्ने उपकरणहरूको व्यवस्थापन गरिरहेको जानकारी दिनुभयो।

Originally published on abcnews.com.np.