काठमाडौं । नेपाली कांग्रेसको इतर समूहले सनातन धर्मलाई नेपालको राष्ट्रिय पहिचानका रूपमा अघि बढाउने प्रतिबद्धता जनाएको छ।

समूहले आयोजना गरेको तीनदिने भेला तथा सम्मेलनबाट पारित पाँचबुँदे प्रस्तावमा सनातन धर्म तथा संस्कृतिको संरक्षणलाई प्राथमिकता दिइएको हो।

प्रस्तावको तेस्रो बुँदामा नेपालमा सनातनदेखि चलिआएको धर्म र संस्कृति राष्ट्रिय पहिचान भएको उल्लेख गर्दै धार्मिक सहिष्णुता, सामाजिक सद्भाव तथा हरेक व्यक्ति र धार्मिक समुदायको धार्मिक स्वतन्त्रता सुनिश्चित गर्नुपर्नेमा जोड दिइएको छ।

प्रस्तावमा हिन्दू, बौद्ध, किरात र प्राकृत धर्मको संरक्षण गर्ने दायित्वलाई दृष्टिगत गर्दै सनातन धर्मलाई राष्ट्रिय पहिचानका रूपमा अघि बढाउने प्रतिबद्धता व्यक्त गरिएको छ।

सम्मेलनको समापन कार्यक्रममा कांग्रेसका पूर्वसभापति शेरबहादुर देउवालाई केही नेताले हिन्दू राष्ट्रका विषयमा धारणा राख्न आग्रह गरेका थिए। देउवाले आफू हिन्दू भएको पटक–पटक उल्लेख गरे पनि हिन्दू राष्ट्रको पक्षमा स्पष्ट धारणा भने राखेनन्।

सम्मेलनबाट पारित लिखित प्रस्तावमा पनि हिन्दू राष्ट्रको विषयमा प्रत्यक्ष पक्षधरता नलिई सनातन धर्मको संरक्षण र राष्ट्रिय पहिचानका रूपमा विकास गर्ने विषय समेटिएको छ। यसलाई कांग्रेस इतर समूहले मध्यमार्गी धारणा अपनाएको रूपमा हेरिएको छ।

त्यस्तै, भेलाले वर्तमान संविधानमा जनअपेक्षाअनुसार आवश्यक संशोधन गर्न संविधानमै रहेको व्यवस्थाअनुसार सम्बन्धित सबै पक्षसँग संवाद गरी निकास खोज्ने प्रस्ताव पनि पारित गरेको छ।

राष्ट्रिय सम्मेलनमा प्रस्तुत विभिन्न प्रस्ताव तथा सुझावलाई समेटेर परिमार्जनसहित पारित प्रस्तावलाई अन्तिम रूप दिने जिम्मेवारी केन्द्रीय सदस्य एनपी साउदको संयोजकत्वमा गठन गरिएको समितिलाई दिइएको छ।

समितिमा केन्द्रीय सदस्य उमाकान्त चौधरी, केन्द्रीय सदस्य सीता राना तथा सहयोगीका रूपमा केन्द्रीय सदस्य मीनबहादुर विश्वकर्मा र दीपकप्रसाद कुइँकेल रहेका छन्।

Originally published on abcnews.com.np.