काठमाडौं । राष्ट्रिय प्रजातन्त्र पार्टी (राप्रपा) का वरिष्ठ उपाध्यक्ष रवीन्द्र मिश्रले नेपाली कांग्रेसको इतर पक्षका नेताहरूप्रति कडा टिप्पणी गरेका छन्। उनले कांग्रेस नेताहरूलाई संवैधानिक राजसंस्था र हिन्दु राष्ट्रको पक्षमा स्पष्ट रूपमा उभिन चुनौती दिएका छन्।

मिश्रले सामाजिक सञ्जालमार्फत कांग्रेस इतर पक्षको हालै सम्पन्न राष्ट्रिय भेलाबाट सार्वजनिक निर्णयप्रति असन्तुष्टि जनाउँदै त्यसलाई ‘वाहियात’ र ‘दोधारे’ भनेका छन्।

कांग्रेसले आफ्नो निर्णयमा बीपी कोइरालाको राष्ट्रिय मेलमिलाप नीतिलाई स्मरण गर्दै राष्ट्रिय तथा लोकतन्त्रवादी शक्तिसँग संवाद गर्ने उल्लेख गरेको विषयमा मिश्रले प्रश्न उठाएका छन्। उनले कांग्रेसले संवैधानिक राजसंस्थामा फर्किने विषय स्पष्ट रूपमा भन्न नसकेको भन्दै नेताहरूलाई चुनौती दिएका हुन्।

‘सिधै संवैधानिक राजसंस्था भन्न किन नसकेको?’

मिश्रले कांग्रेस नेताहरूलाई प्रश्न गर्दै भनेका छन्, ‘यति महत्त्वपूर्ण विषयमा यस्तो वाहियात, दोधारे, काइते भाषा प्रयोग गर्ने? सिधै हामी कांग्रेसको मौलिक नीति–संवैधानिक राजसंस्थामा फर्किनेछौँ किन भन्न नसकेको? कसको डर लाग्यो?’

उनले जनतालाई भ्रममा पारेर सत्तामा पुग्ने प्रयास नगर्नसमेत कांग्रेस नेताहरूलाई चेतावनी दिएका छन्। उनले लेखेका छन्, ‘जनतालाई उल्लु बनाएर सत्तामा पुग्ने पाप नगर्नुस्। हुतिहारा नेताहरूबाट केही अपेक्षा नगरे हुन्छ।’

‘हिन्दु राष्ट्र’बारे पनि प्रश्न

कांग्रेस इतर पक्षले ‘सनातन धर्मलाई राष्ट्रिय पहिचानका रूपमा अघि बढाउने’ निर्णय गरेको विषयमा पनि मिश्रले असन्तुष्टि जनाएका छन्।

उनले ‘सनातन धर्म’ भन्दा स्पष्ट रूपमा ‘हिन्दु राष्ट्र’ भन्न कांग्रेस नेताहरूले आँट गर्नुपर्ने बताएका छन्। मिश्रले संसारभर हिन्दु, बौद्ध, इसाई र इस्लामजस्ता प्रमुख धर्मका रूपमा चिनिने उल्लेख गर्दै ‘सनातन धर्म’ शब्दले अन्तर्राष्ट्रिय रूपमा अन्योल सिर्जना गर्न सक्ने तर्क गरेका छन्।

मिश्रले विगत ३५ वर्षको शासन व्यवस्थाप्रति समेत आलोचनात्मक धारणा राख्दै आफू र आफ्ना सहकर्मीले विगतका गल्ती स्वीकार गरेर दृष्टिकोण परिवर्तन गरेको दाबी गरेका छन्।

‘आँट र स्पष्टता सिक्न मकहाँ आउनुस्’

मिश्रले कांग्रेस नेताहरूलाई राजनीतिक अनुभव र विगतका संघर्षको धाक नलगाउन आग्रह गर्दै स्पष्ट राजनीतिक दृष्टिकोण बनाउन चुनौती दिएका छन्।

उनले भनेका छन्, ‘आँट र प्रष्टता सिक्न चाहनुहुन्छ भने मकहाँ आउनुस्! सिकाएर पठाइदिउँला।’

नेपालमा पछिल्लो समय हिन्दु राष्ट्र र राजसंस्थाको विषयमा राजनीतिक बहस तीव्र भइरहेका बेला मिश्रको यस्तो अभिव्यक्तिले कांग्रेसभित्रको उक्त धारामाथि थप राजनीतिक दबाब सिर्जना गर्ने देखिएको छ।

Originally published on abcnews.com.np.