जनकपुरधाम । भुस खरिदबापतको करिब ५० लाख रुपैयाँ भुक्तानी नगरेको आरोपमा जनकपुर रिफाइनरीसँग सम्बन्धित चारजनाविरुद्ध ठगी तथा विश्वासघातसम्बन्धी मुद्दा दर्ता भएको छ।

जिल्ला सरकारी वकिलको कार्यालय धनुषाले साउन २० गते जनकपुर रिफाइनरीसँग सम्बन्धित चार व्यक्तिविरुद्ध मुद्दा दर्ता गरेको हो। मुद्दा दर्तासँगै उनीहरूलाई पक्राउ गर्न जिल्ला अदालत धनुषाबाट पक्राउ पुर्जी जारी गर्न अनुमति प्राप्त भएको प्रहरीले जनाएको छ।

पक्राउ पुर्जी जारी हुनेमा जनकपुर रिफाइनरीकी सञ्चालक ३५ वर्षीया रइसा टिवडेवाल, उनका पति तथा कम्पनीका प्रबन्धक ४० वर्षीय विनित अग्रवाल, सञ्चालककी दाइ ४५ वर्षीय रोमिल टिवडेवाल र कम्पनीका पर्चेज डाइरेक्टर ३५ वर्षीय मुन्नाकुमार सिंह (राकेश) रहेका छन्।

चारैजना फरार

जिल्ला प्रहरी कार्यालय धनुषाका अनुसार पक्राउ पुर्जी जारी भएका चारैजना हाल फरार छन्। प्रहरीले उनीहरूको खोजी तीव्र पारेको जनाएको छ।

धनुषा प्रहरीका प्रवक्ता डीएसपी मधुसूदन न्यौपानेले चारैजनाको खोजी भइरहेको जानकारी दिएका छन्।

मुद्दा दर्ता भएसँगै प्रहरीले उनीहरूलाई पक्राउ गरी घटनाबारे थप अनुसन्धान गर्ने तयारी गरेको छ।

४९ लाख ४९ हजार रुपैयाँभन्दा बढी बक्यौता

जनकपुर रिफाइनरीले भुस खरिद गरेबापत करिब ५० लाख रुपैयाँ भुक्तानी नगरेको विषय यसअघि नै सार्वजनिक भएको थियो।

प्राप्त कम्पनीको आन्तरिक सप्लायर लेजरअनुसार रोशन भुसा खरिद बिक्री केन्द्रको नाममा ४९ लाख ४९ हजार ८८३ रुपैयाँ ५० पैसा बक्यौता देखिएको छ।

भुस आपूर्तिकर्ताका अनुसार जनकपुर रिफाइनरीकै आग्रहमा स्थानीय किसानबाट भुस खरिद गरी उद्योगमा आपूर्ति गरिएको थियो। कारोबार सुरुका दिनमा नियमित रूपमा भुक्तानी हुँदै आए पनि कारोबारको मात्रा बढ्दै गएपछि उद्योगले रकम भुक्तानी गर्न छाडेको उनीहरूको आरोप छ।

बक्यौता रकम माग्दा उद्योग परिसरमा प्रवेश गर्नसमेत रोक लगाइएको आपूर्तिकर्ताले बताएका छन्।

उद्योग सञ्चालकदेखि वाणिज्य संघ अध्यक्षसम्म

यस प्रकरणमा पक्राउ पुर्जी जारी भएका मुन्नाकुमार सिंह (राकेश) ढल्केवर उद्योग वाणिज्य संघका अध्यक्षसमेत हुन्।

अब प्रहरीले पक्राउ पुर्जी कार्यान्वयन गर्दै चारैजनालाई नियन्त्रणमा लिएपछि भुस खरिद, आपूर्तिकर्तासँगको कारोबार, बक्यौता रकम तथा रकम भुक्तानी रोकिएको भनिएको कारणबारे अनुसन्धान अघि बढाउनेछ।

ठगी तथा विश्वासघातसम्बन्धी आरोपमा मुद्दा दर्ता भए पनि अदालतबाट दोषी ठहर नभएसम्म आरोपित व्यक्तिहरूलाई कानुनबमोजिम निर्दोष मानिनेछन्।

Originally published on abcnews.com.np.