काठमाडौं । नेपाली कांग्रेसका महामन्त्री प्रदीप पौडेलले पार्टीको आधिकारिकता विवादमा सर्वोच्च अदालतको आदेशबाट आत्तिनुपर्ने अवस्था नरहेको बताएका छन्।

सोमबार ललितपुरको सानेपास्थित पार्टी केन्द्रीय कार्यालयमा जारी केन्द्रीय कार्यसमिति बैठकलाई सम्बोधन गर्दै पौडेलले पूर्वसभापति शेरबहादुर देउवाको भूमिकाप्रति असन्तुष्टि जनाउँदै पार्टीलाई रणनीतिक ढङ्गबाट अघि बढाउनुपर्ने बताए।

“रणनीतिक ढङ्गबाट हामीले आफूलाई अगाडि बढाऔँ। त्यस्तो धेरै आत्तिइहाल्नुपर्ने अवस्था छ भन्ने मलाई लाग्दैन,” पौडेलले भने, “हामीले अपेक्षा गरेका थियौँ, शेरबहादुर दाइ रेफ्री भएर फर्कनुहुन्छ। शेरबहादुर दाइ कुनै टिमको जर्सी लगाएर फर्कनुहुन्न भन्ने हाम्रो अपेक्षा थियो। तर हामी अपेक्षा गर्नेहरू पनि त्यस्तै हौँ।”

देउवामाथि पौडेलको आलोचना

पौडेलले देउवाले विचारको उचाइ कायम गरेर राजनीति नगरेको आरोप लगाए। गुट निर्माण र शक्तिकेन्द्रसँगको सम्बन्धका आधारमा देउवाले राजनीति गरेको उनको दाबी थियो।

“गुट बनाएर, शक्तिसँग जोडिएर शक्ति केन्द्र निर्माण गरेर उहाँले राजनीति गर्नुभयो। त्यसैले विचारको उचाइ प्राप्त हुने जुन अवसर थियो, मेरो विचारमा हाम्रो पूर्वसभापतिज्यूले त्यो गुमाउनुभयो,” उनले भने।

यस विषयमा धेरै चिन्ता गरेर पार्टी अलमलमा पर्न नहुने पौडेलले बताए।

‘नेमप्लेट राखेर कोही सभापति हुँदैन’

पौडेलले पार्टी सभापतिको विषयमा पनि टिप्पणी गर्दै कुनै अनधिकृत भेलामा दस्ताबेज प्रस्तुत गर्दैमा त्यसले वैधानिकता नपाउने बताए।

“चुनदेवीमा सभापतिको नेमप्लेट राखेर कोही सभापति हुने होइन,” उनले भने, “कुनै ढङ्गले पनि वैधानिक मान्न नमिल्ने भेलामा दस्ताबेज प्रस्तुत गरेर त्यो आधिकारिक हुने होइन।”

उनले कांग्रेसको सभापतिलाई तत्कालीन महामन्त्री भनेर सम्बोधन गर्दैमा कसैको राजनीतिक उचाइ नबढ्ने टिप्पणी गरे। बरु सुशासनको विपक्षमा रहेको आरोप लाग्ने भएकाले त्यसको जिम्मेवारी लिन आवश्यक नरहेको उनको भनाइ थियो।

प्रविधिमार्फत सदस्य व्यवस्थापन

बैठकमा पार्टी सदस्यता व्यवस्थापनबारे पनि पौडेलले धारणा राखेका थिए। उनले सदस्यहरूलाई ‘अद्यावधिक’ गर्नेभन्दा प्रविधिको माध्यमबाट सदस्यहरूको व्यवस्थापन गर्ने विषयलाई प्राथमिकता दिइएको बताए।

उनका अनुसार चुनावी प्रतिज्ञापत्रमा उल्लेख गरिएका धेरै विषय इतर पक्षको दस्ताबेजमा समेत समेटिएका छन्।

पौडेलले यथास्थितिवादी अवस्थामा रहेको पार्टीलाई परिवर्तन गर्ने प्रक्रियाको नेतृत्व सभापति गगन थापाले गरिरहेको दाबी गरे। पार्टीलाई थप मजबुत बनाउन टिमवर्कका साथ सभापति थापाको नेतृत्वमा अघि बढ्नुपर्नेमा उनले जोड दिए।

Originally published on abcnews.com.np.