काठमाडौं । स्मार्ट टेलिकमको सम्पत्ति लिलामीसम्बन्धी विवादमा नेपाल इन्भेष्टमेन्ट मेगा बैंक (एनआईएमबीएल) का अध्यक्ष पृथ्वीबहादुर पाँडे र प्रमुख कार्यकारी अधिकृत (सीईओ) ज्योतिप्रकाश पाण्डेविरुद्ध प्रहरीको केन्द्रीय अनुसन्धान ब्यूरो (सीआईबी) ले खोजी तथा पक्राउको तयारी थालेको छ।

सीआईबीका प्रमुख एआईजी उमाप्रसाद चतुर्वेदीका अनुसार उनीहरूविरुद्ध ठगी र आपराधिक विश्वासघातसम्बन्धी कसुरमा अनुसन्धान भइरहेको छ। दुवैजना अदालतको आदेशपछि थुनाबाहिर रहे पनि लामो समयदेखि अनुसन्धान प्रक्रियामा उपस्थित नभएको प्रहरीको दाबी छ।

एनआईएमबीएलले सरकारी स्वामित्वमा गएको स्मार्ट टेलिकमको सम्पत्ति २०८२ असोजमा ४ अर्ब ६० करोड रुपैयाँमा एनसेललाई लिलामी गरेको थियो। स्मार्ट टेलिकमले नेपाल दूरसञ्चार प्राधिकरणलाई नवीकरण दस्तुर र रोयल्टीबापत करिब ३० अर्ब रुपैयाँ तिर्न नसकेपछि २०८० वैशाख ३ गते उसको अनुमतिपत्र स्वतः रद्द भएको थियो।

दूरसञ्चार सेवा प्रदायकको सम्पत्ति व्यवस्थापन नियमावली, २०७९ अनुसार अनुमतिपत्र रद्द भएका कम्पनीको पूर्वाधार तथा सम्पत्तिमा राज्यको अधिकार रहने व्यवस्था छ। त्यसअनुसार स्मार्ट टेलिकमको सम्पत्ति नेपाल दूरसञ्चार प्राधिकरणको स्वामित्वमा गएको थियो।

अनुसन्धानका क्रममा सीईओ ज्योतिप्रकाश पाण्डे वैशाख २९ गते सिन्धुलीको कमलामाई नगरपालिका–६ स्थित बसपार्कबाट पक्राउ परेका थिए। तर सर्वोच्च अदालतको आदेशपछि उनलाई हाजिरी जमानीमा रिहा गरिएको थियो।

अध्यक्ष पृथ्वीबहादुर पाँडे भने पक्राउको सम्भावना भएपछि साउन २१ गते सर्वोच्च अदालतबाट अन्तरिम आदेश लिएर थुनाबाहिर रहेको प्रहरीले जनाएको छ।

सीआईबी प्रमुख चतुर्वेदीका अनुसार सीईओ पाण्डेलाई आवश्यक प्रक्रिया पूरा गरी पक्राउ पुर्जीका आधारमा नियन्त्रणमा लिएर अदालतमा बुझाउने तयारी छ। अध्यक्ष पाँडेको हकमा भने प्रहरी कानुनी परामर्शमा रहेको छ।

प्रहरीका अनुसार अदालतबाट अनुसन्धानमा सहयोग गर्ने सुविधा पाए पनि दुवैजना लामो समयदेखि अनुसन्धान प्रक्रियामा उपस्थित नभएकाले उनीहरूको खोजी तथा पक्राउ प्रक्रिया अघि बढाइएको हो।

Originally published on abcnews.com.np.