लमजुङ । लमजुङको मध्यनेपाल नगरपालिका–७ कमेरे भञ्ज्याङमा पहिरो जाँदा रामबजार–गिलुङ–साल्मे भञ्ज्याङ–घाम्राङ सडकखण्ड भासिएको छ।

सडक भासिएपछि गिलुङ, साल्मे भञ्ज्याङ र घाम्राङतर्फको यातायात पूर्ण रूपमा अवरुद्ध भएको छ भने कमेरे भञ्ज्याङ बस्तीसमेत पहिरोको जोखिममा परेको छ।

स्थानीयका अनुसार साउन २८ गते राति परेको वर्षापछि सडक चिरिएको थियो। त्यसपछि लगातार वर्षा हुँदा सडक भासिएर पहिरो गएको हो। मध्यनेपाल नगरपालिका–७ का वडाध्यक्ष हिराबहादुर गुरुङका अनुसार पहिरोको अवस्था तत्काल मर्मत गर्न सकिने खालको छैन।

पहिरोका कारण सडकसँगै बस्तीसमेत जोखिममा रहेकाले स्थानीयलाई सतर्क रहन आग्रह गरिएको छ।

क्व्होलासोथार गाउँपालिकाका अध्यक्ष सूर्यप्रसाद गुरुङले उक्त सडक गाउँपालिका केन्द्रसहित मिदिमपारिका गाउँबस्तीलाई प्रदेश राजधानी पोखरासँग जोड्ने मुख्य मार्ग भएकाले पहिरोले ठूलो समस्या निम्त्याएको बताए।

उनका अनुसार सडक बगाएपछि क्व्होलासोथारका धेरै गाउँबस्तीको पोखरासँगको यातायात सम्पर्क प्रभावित भएको छ। सडक तत्काल मर्मत गर्न पालिकाको स्रोत र क्षमताले नभ्याउने भएकाले प्रदेश र संघीय सरकारसँग सहयोग माग्नुपर्ने अवस्था आएको उनले बताए।

पहिरोका कारण सडकमा यातायात पूर्ण रूपमा प्रभावित भएको छ। पोखरा यातायात प्रालि (लेखनाथ) का दुईवटा बस साल्मे भञ्ज्याङ–घाम्राङतर्फ रोकिएका छन्।

मध्यनेपाल नगरपालिकाकी उपप्रमुख सीता गुरुङले जोखिमयुक्त बस्तीको सुरक्षाका लागि प्रदेश र संघीय सरकारले तत्काल ध्यान दिनुपर्ने बताइन्।

स्थानीय जनप्रतिनिधिले सडक मर्मतसँगै पहिरोको उच्च जोखिममा रहेको कमेरे भञ्ज्याङ बस्तीको संरक्षणलाई प्राथमिकता दिन माग गरेका छन्। आवश्यक परे जोखिममा रहेका परिवारलाई सुरक्षित स्थानमा स्थानान्तरण गर्नसमेत पहल गर्नुपर्ने उनीहरूको भनाइ छ।

Originally published on abcnews.com.np.