काठमाडौं । परराष्ट्रमन्त्री शिशिर खनालले दिएको जवाफमा चित्त नबुझेपछि राष्ट्रिय स्वतन्त्र पार्टी (रास्वपा) की सांसद आशिका तामाङ प्रतिनिधिसभाको बैठकबाट बाहिरिएकी छन्।

मन्त्री खनालले प्रतिनिधिसभामा सांसदहरूले उठाएका प्रश्नको जवाफ दिइरहेका बेला सांसद तामाङले उठेर थप प्रश्न राख्न खोजेकी थिइन्। तर सभामुखले तत्काल बोल्ने समय नदिएपछि उनी र सभामुखबीच केहीबेर भनाभनजस्तो अवस्था बनेको थियो।

सभामुखले ‘मैले बोल्ने समय दिएको छैन, बस्नुहोस्’ भन्दै उनलाई आफ्नो स्थानमा बस्न आग्रह गरेका थिए। तर तामाङले आफ्नो प्रश्नको जवाफ स्पष्ट नभएको भन्दै बोल्न पाउनुपर्ने अडान राखेकी थिइन्।

यसअघि सभामुखले अघिल्लो दिन यस विषयमा रुलिङ गरेका थिए। त्यसपछि परराष्ट्रमन्त्री खनालले आज प्रतिनिधिसभामा सरकारको तर्फबाट जवाफ दिएका हुन्। तर मन्त्रीको जवाफबाट आफू सन्तुष्ट नभएको जनाउँदै तामाङले पुनः प्रश्न उठाउन खोजेकी थिइन्।

सभामुखले संसद्को मर्यादा कायम गर्न निर्देशन दिएपछि तामाङले आफ्नो झोला उठाएर बैठकस्थलबाट बाहिरिएकी हुन्।

सांसद तामाङले कम्बोडियामा ३७ दिनअघि निधन भएका धादिङका सन्तोष राईको शव नेपाल ल्याउने विषयमा सरकारसँग जवाफ मागेकी थिइन्। मृतकको शव लामो समयदेखि विदेशमै रहेको भन्दै उनले सरकारको उद्धार तथा शव नेपाल ल्याउने प्रक्रियाबारे प्रश्न उठाएकी थिइन्।

उनले यही विषयमा परराष्ट्रमन्त्री खनालसँग जवाफ मागे पनि प्राप्त जवाफ आफूले अपेक्षा गरेअनुसार नभएको बताएकी थिइन्। घटनापछि प्रतिनिधिसभा बैठकमा केही समय असहज अवस्था देखिएको थियो।

Originally published on abcnews.com.np.