एबीपी न्युजसँगको अन्तर्वार्तामा कुन्द्राले हिरासतमा रहँदा पत्नी तथा अभिनेत्री शिल्पा शेट्टीले आफूलाई सम्बन्धविच्छेद गर्न लागेको हल्ला सुनेपछि मानसिक रूपमा निकै विचलित भएको बताएका छन् । उनले त्यसबेला आत्महत्या गर्ने सोचसमेत आएको खुलासा गरेका छन् ।

कुन्द्राका अनुसार जेलमा क्षमताभन्दा धेरै कैदी राखिएको थियो । उनले पार्ले–जी बिस्कुट र पानीकै भरमा समेत दिन बिताउनुपरेको र त्यस अवधिमा आफ्नो तौल १७–१८ किलो घटेको बताएका छन् ।

उनले हिरासतमा रहँदा एक दिन शिल्पाले आफूलाई छाड्न लागेको हल्ला सुनेको बताए । त्यसपछि आफू रातभर सुत्न नसकेको र जीवन नै समाप्त गर्ने सोच आएको उनको भनाइ छ ।

तर, भोलिपल्ट शिल्पासँग फोनमा कुराकानी भएपछि आफूमा नयाँ ऊर्जा आएको उनले बताए । शिल्पाले हल्ला गलत भएको र आफू उनको साथमा रहेको बताएपछि आफूले कठिन परिस्थितिसँग सामना गर्ने साहस पाएको कुन्द्राको भनाइ छ ।

२०२१ मा पक्राउ

सन् २०२१ मा मुम्बई प्रहरीको अपराध शाखाले मोबाइल एपमार्फत अश्लील सामग्री उत्पादन तथा वितरण गरेको आरोपमा कुन्द्रालाई पक्राउ गरेको थियो । प्रहरीले अश्लील सामग्री हटसट्स र बलीफेमलगायत एपमा अपलोड हुने गरेको दाबी गरेको थियो ।

कुन्द्राको कम्पनी वियान इन्डस्ट्रिजले ती एप सञ्चालनमा सहयोग गरेको प्रहरीको आरोप थियो । अनुसन्धानका क्रममा ह्वाट्सएप, इमेल तथा विद्युतीय उपकरणबाट प्राप्त सामग्रीलाई प्रमाणका रूपमा प्रयोग गरिएको थियो ।

कुन्द्राले भने आफूविरुद्ध लगाइएका आरोप अस्वीकार गर्दै आफूलाई फसाइएको दाबी गर्दै आएका छन् । ६३ दिन हिरासतमा बसेपछि उनी अदालतको आदेशमा जमानतमा रिहा भएका थिए ।

उक्त मुद्दा अझै अदालतमा विचाराधीन रहेको छ । शिल्पा शेट्टी र राज कुन्द्राबीच सम्बन्धविच्छेद भएको भन्ने चर्चा चले पनि उनीहरूबीच सम्बन्ध कायम रहेको बताइएको छ।