काठमाडौं । चलचित्र ‘द राइज अफ साम्राज्य’मा अभिनेता विजय बराल अनुबन्ध भएका छन्। लगातार चर्चित कलाकारलाई अनुबन्ध गरिरहेको चलचित्रमा यसअघि सौगात मल्ल, दयाहाङ राई र नाजिर हुसेन जोडिइसकेका छन्।

निर्देशक सौरभ चौधरीले चलचित्रको कथाअनुसार कलाकार छनोटमा कुनै सम्झौता नगरेको बताएका छन्। “हाम्रो कथा जस्तो छ, त्यस्तै कलाकार अनुबन्ध गराउन हामीले कुनै पनि कन्जुस्याइँ गरेका छैनौँ,” उनले भने, “सिनेमा राम्रो बनाउन हामीले यो पटक कुनै पनि पक्षमा सम्झौता गर्दैनौँ।”

डार्क हर्स इन्टरटेन्मेन्टको ब्यानरमा निर्माण हुन लागेको चलचित्र मल्टिस्टार हुने निर्देशक चौधरीले बताए। उनले चलचित्रको कलाकार लाइनअपमा थप ‘सरप्राइज’ अझै बाँकी रहेको जानकारी दिएका छन्।

‘द राइज अफ साम्राज्य’को कथा तथा पटकथा उपन्यासकार बुद्धिसागरले लेखेका हुन्। निर्देशक चौधरीका अनुसार चलचित्र ‘एपिक एक्सन ड्रामा’ विधामा निर्माण हुनेछ।

चलचित्रको छायांकन भदौको पहिलो साताबाट सुरु गर्ने तयारी छ। यसको निर्मातामा प्रवेश चौधरी र निला देव रहेका छन् भने को–प्रोड्युसरमा विश्वास बस्नेत (बेन) र कार्यकारी निर्मातामा शंकर पाण्डे छन्। चलचित्रको डीओपीको जिम्मेवारी मानकृष्ण महर्जनले सम्हाल्नेछन्।

Originally published on abcnews.com.np.