दक्षिण कोरियाको रक्षा मन्त्रालयका अनुसार सन् २०२६ को अभ्यासको अवधि र आकार अमेरिकाको प्रस्तावपछि समायोजन गरिएको हो। यसअघि अगस्ट २७ सम्म सञ्चालन हुने भनिएको अभ्यास अब अगस्ट २१ मै समाप्त हुनेछ ।

अमेरिकी राष्ट्रपति डोनाल्ड ट्रम्पले उत्तर कोरियाली नेता किम जोङ उनसँग आफ्नो सम्बन्ध राम्रो रहेको बताउँदै दक्षिण कोरियासँग हुने संयुक्त सैन्य अभ्यास कटौती गर्ने योजना सार्वजनिक गरेपछि अभ्यासको अवधि घटाइएको हो ।

दक्षिण कोरियाका परराष्ट्रमन्त्री चो ह्युनले संसदीय सुनुवाइका क्रममा ट्रम्पको उक्त योजनाबारे दक्षिण कोरियाली वा अमेरिकी अधिकारीहरूलाई पूर्वजानकारी नभएको बताएका छन् ।

अभ्यासअन्तर्गत हुने संयुक्त स्थलगत तालिमको हिस्सा पनि केही घटाइने दक्षिण कोरियाले जनाएको छ। यद्यपि, त्यसको विस्तृत विवरणबारे अझै छलफल भइरहेको छ ।

अभ्यासको अवधि र आकार घटाउने निर्णयले अमेरिका–दक्षिण कोरिया सुरक्षा सम्बन्ध तथा आवश्यक परेका बेला सहयोग गर्ने अमेरिकी प्रतिबद्धतामाथि दक्षिण कोरियाको विश्वासबारे प्रश्न उठाएको बीबीसीले जनाएको छ।