वासिङ्टन डीसी । भेनेजुएलाका पूर्वराष्ट्रपति निकोलस मदुरोको रिहाइका लागि यसअघि आवाज उठाउँदै आएको सरकार अहिले भने उनलाई बिर्सिएको जस्तो देखिएको विपक्षी नेताहरूले बताएका छन् ।

गत जनवरीमा भेनेजुएलाकी अन्तरिम राष्ट्रपति डेल्सी रोड्रिगेजले मदुरो र उनकी पत्नी सिलिया फ्लोरेसलाई पक्राउ गर्ने अमेरिकी कदमलाई ‘घिनलाग्दो आक्रमण’ भन्दै मदुरोको रिहाइ माग गरेकी थिइन् । त्यतिबेला भेनेजुएलाका सभामुख होर्खे रोड्रिगेजले पनि मदुरो रिहा नभएसम्म आफूहरू विश्राम नलिने बताएका थिए ।

तर, पछिल्लो समय सरकार र विपक्षीबीच भएको वार्तामा मदुरोको रिहाइको विषय नै नउठेको बताइएको छ । फाइनान्सियल टाइम्सले एक विपक्षी नेतालाई उद्धृत गर्दै वार्तामा मदुरो र फ्लोरेसको विषय उल्लेख नभएको र सरकारले उनीहरूलाई इतिहासबाटै मेटाएजस्तो देखिएको जनाएको छ ।

अमेरिकी कमान्डोहरूले जनवरी ३ मा मदुरोलाई पक्राउ गरी अमेरिका लगेका थिए । हाल उनी अमेरिकाको न्युयोर्कस्थित ब्रुकलिन जेलमा छन् । उनीमाथि लागुऔषध तस्करीसम्बन्धी अभियोग लगाइएको छ ।

मदुरो पक्राउ परेपछि अमेरिकी राष्ट्रपति डोनाल्ड ट्रम्प प्रशासनले रोड्रिगेज नेतृत्वको सरकारलाई मान्यता दिएको बताइएको छ । त्यसको बदलामा रोड्रिगेज सरकारले अमेरिकी कम्पनीलाई भेनेजुएलाको तेल क्षेत्रमा पहुँच दिएको उल्लेख गरिएको छ ।

भेनेजुएलाका विश्लेषक एडवर्ड रोड्रिगेजले मदुरोको भविष्य लगभग तय भइसकेको दाबी गरेका छन् । उनका अनुसार सरकारको अहिलेको मुख्य प्राथमिकता आफ्नो अस्तित्व जोगाउनु रहेको छ ।

सरकार र विपक्षीबीच हालै भएको दुई साताको वार्तामा नयाँ राष्ट्रपतीय निर्वाचन गराउने विषयसमेत उठेको थियो । तर, त्यसमा उल्लेखनीय प्रगति हुन सकेन । वार्ताको मुख्य ध्यान जुनमा गएको भूकम्पपछि राहतका लागि आवश्यक रकम जुटाउन बैंक अफ इंग्ल्यान्डमा रहेको करिब ४ अर्ब डलर बराबरको सुन फुकुवा गर्ने विषयमा केन्द्रित भएको बताइएको छ ।

वार्तापछि सरकारले १३१ जना राजनीतिक बन्दीलाई रिहा गरेको छ ।

Originally published on abcnews.com.np.