काठमाडौं । राष्ट्रिय प्रजातन्त्र पार्टी (राप्रपा)ले बागमती प्रदेश सभा संसदीय दलका नेता उद्धव थापालाई निलम्बन गरेको छ।

बिहीबार बसेको पार्टी केन्द्रीय कार्यसम्पादन समितिको बैठकले थापालाई पार्टी सदस्यताबाट निलम्बन गर्ने निर्णय गरेको हो। साथै, उनलाई बागमती प्रदेश सभा सदस्य पदबाट समेत पदमुक्त गर्न सिफारिस गरिएको राप्रपाले जनाएको छ।

पार्टीको निर्णय र पटक–पटक दिइएको निर्देशनविपरीत प्रदेश सरकार गठनमा समर्थन दिएको भन्दै थापामाथि कारबाही गरिएको राप्रपाले जनाएको छ। केन्द्रीय अनुशासन समितिको सिफारिसका आधारमा राप्रपा विधानको धारा ३० (ड) र ३२ (ङ) बमोजिम प्रदेश सभा सदस्यबाट पदमुक्त गर्न, पार्टी सदस्यता निलम्बन गर्न तथा निर्णयको जानकारी सम्बन्धित निकायलाई पठाउने निर्णय भएको प्रवक्ता एवं प्रचार विभाग प्रमुख मोहनकुमार श्रेष्ठद्वारा जारी विज्ञप्तिमा उल्लेख छ।

राप्रपाले पार्टीको निर्णय र निर्देशनविपरीत सरकार निर्माणसम्बन्धी गतिविधिमा संलग्न नहुन बागमती प्रदेश सभा सदस्यलाई समेत निर्देशन दिएको छ।

पार्टीको निर्णय वा निर्देशनबिना सरकारलाई समर्थन गर्ने वा सरकारमा सहभागी हुने गतिविधिमा कुनै प्रदेश सभा सदस्य संलग्न भएमा सोहीअनुसार कारबाही गर्ने निर्णय भएको राप्रपाले जनाएको छ।

बैठकको उक्त निर्णयप्रति राप्रपाका पूर्वअध्यक्ष कमल थापाले भने फरक मत राखेका छन्।

Originally published on abcnews.com.np.