काठमाडौं । राष्ट्रिय स्वतन्त्र पार्टी (रास्वपा)का सांसद यज्ञमणि न्यौपानेले अख्तियार दुरुपयोग अनुसन्धान आयोगका पदाधिकारीलाई प्रधानमन्त्री तथा मन्त्रिपरिषद्को कार्यालयबाट मुद्दा चलाउन दबाब आएको हो कि होइन भन्नेबारे स्पष्ट पार्न माग गरेका छन्।

बिहीबार सिंहदरबारमा बसेको राज्य व्यवस्था तथा सुशासन समितिको बैठकमा बोल्दै सांसद न्यौपानेले अख्तियारका प्रमुख आयुक्त, आयुक्तलगायत पदाधिकारीलाई प्रधानमन्त्री कार्यालयमा बोलाएर जबरजस्ती मुद्दा चलाउन निर्देशन दिएको भन्ने विषय सार्वजनिक भएको भन्दै त्यसको सत्यतथ्य स्पष्ट गर्न माग गरे।

उनले प्रधानमन्त्री कार्यालयबाट गैरकानुनी रूपमा दबाब दिइएको भए अख्तियारका पदाधिकारीले त्यसविरुद्ध औपचारिक उजुरी वा कानुनी प्रक्रिया अघि बढाए कि नबढाएको प्रश्न गरे।

‘प्रधानमन्त्री तथा मन्त्रिपरिषद्को कार्यालयले तपाईंहरूविरुद्ध गैरकानुनी काम गरेको हो भने त्यसका विरुद्ध तपाईंहरूले मुद्दा उठान गर्नुभयो कि भएन? उजुरी कतै हाल्नुभयो कि भएन?’ उनले प्रश्न गरे।

सांसद न्यौपानेले उजुरी नगरी सञ्चारमाध्यममार्फत मात्रै विषय सार्वजनिक गर्नु र पदमा निरन्तर बसिरहनु शपथको भावनाअनुकूल हुन्छ कि हुँदैन भन्ने विषयमा समेत आयोगका पदाधिकारीसँग जवाफ मागे।

यदि प्रधानमन्त्री कार्यालयबाट दबाब दिएर मुद्दा दायर गर्न लगाइएको भन्ने समाचार गलत हो भने सम्बन्धित सञ्चारमाध्यमविरुद्ध कानुनी प्रक्रिया अघि बढाउनुपर्ने उनको भनाइ थियो। समाचार सत्य भए त्यसबारे स्पष्ट तथ्य सार्वजनिक गर्नुपर्ने उनले बताए।

‘भोलि कुनै निकायले तपाईंहरूलाई प्रेसर गर्‍यो र मेरो सभापतिमाथि मुद्दा उठान गर्दै भनेर ७ घण्टाको ठाउँमा ९ घण्टा राखिदियो भने मुद्दा उठान गर्ने? यो त हुँदैन होला नि,’ न्यौपानेले भने।

Originally published on abcnews.com.np.