जिल्ला प्रशासन कार्यालय पर्वतको आयोजना तथा जिल्ला प्रहरी कार्यालय पर्वतको सहकार्यमा प्रमुख जिल्ला अधिकारी लक्ष्मीप्रसाद पौडेलको संयोजकत्वमा अभियान सञ्चालन गरिएको हो।

अभियानअन्तर्गत कुश्मा नगरपालिका–७ खरिया क्षेत्रका विभिन्न ग्यारेज, किराना पसल तथा कुश्मा बजारका अन्य सम्भावित जोखिमयुक्त स्थानमा सरसफाइ गरिएको छ। सुरक्षाकर्मी तथा सरोकारवाला निकायका प्रतिनिधिले घर तथा पसल वरपर जमेको पानी हटाउनुका साथै पानी जम्न सक्ने भाँडाकुँडा, पुराना टायर, बोतल, बाल्टिनलगायत सामग्री हटाएका थिए।

टोलीले लामखुट्टेको सम्भावित प्रजननस्थल पहिचान गरी नष्ट गर्दै कुश्माको शिवालय चोकदेखि खरेहासम्म सरसफाइ गरेको हो।

वर्षापछि गमला, पुराना टायर, बोतल, बाल्टिन, छत तथा कुलरलगायत स्थानमा पानी जम्दा एडिस लामखुट्टेका लागि प्रजननस्थल बन्न सक्छ। तातो र ओसिलो मौसम लामखुट्टेको वृद्धि तथा गतिविधिका लागि अनुकूल हुने भएकाले वर्षायाममा डेंगुको जोखिम बढी हुने चिकित्सकहरू बताउँछन्।

डेंगु संक्रमित व्यक्तिलाई एडिस लामखुट्टेले टोकेपछि त्यही लामखुट्टेले स्वस्थ व्यक्तिलाई टोक्दा डेंगु भाइरस सर्ने गर्छ। घना बस्ती, सरसफाइको कमी र घर वरिपरि थोरै मात्रामा पानी जम्ने अवस्थाले समेत संक्रमण फैलिने जोखिम बढाउने चिकित्सकहरूको भनाइ छ।

पर्वत अस्पतालका मेडिकल सुपरिटेन्डेन्ट डा. ढुण्डिराज पौडेलका अनुसार डेंगु सार्ने एडिस लामखुट्टे दिनको समयमा, विशेषगरी बिहान र साँझ बढी सक्रिय हुन्छ। त्यसैले राति मात्र लामखुट्टेको टोकाइबाट जोगिनु पर्याप्त नहुने उनले बताए।

प्रदेश जनस्वास्थ्य कार्यालय पर्वतका सूचना अधिकारी सुमन शर्माका अनुसार यस वर्ष पर्वतमा हालसम्म डेंगुका २७ जना नयाँ बिरामी भेटिएका छन्। तीमध्ये १२ जना निको भएका छन् भने १४ जना घरमै उपचाररत छन्। एक जना अस्पतालमा उपचाररत रहेको शर्माले जानकारी दिए।