जसपा नेपालका अध्यक्ष उपेन्द्र यादवको प्रमुख आतिथ्यमा शुक्रबार जनकपुरमा बसेको प्रदेशस्तरीय बैठकले भदौ २७ गते जनकपुर र असोज ३ गते वीरगन्जमा संयुक्त भेला आयोजना गर्ने निर्णय गरेको हो।

भदौ २७ गते जनकपुरमा हुने भेलामा सप्तरी, सिरहा, धनुषा, महोत्तरी र सर्लाहीका नेता तथा कार्यकर्ता सहभागी हुनेछन्। त्यस्तै, असोज ३ गते वीरगन्जमा हुने भेलामा रौतहट, बारा र पर्साका नेता तथा कार्यकर्ताको सहभागिता रहनेछ।

बैठकले सिरहामा नेपाल प्रहरीको गोली प्रहारबाट गणेश यादवको मृत्यु तथा बाराकी तीन वर्षीया बालिका गरिमा चौधरीको हत्या भएको घटनाप्रति दुःख व्यक्त गर्दै शोक प्रस्ताव पारित गरेको छ।

मोर्चाले दुवै घटनाका पीडित परिवारलाई तत्काल न्याय र उचित क्षतिपूर्ति उपलब्ध गराउन तथा घटनामा संलग्न दोषीमाथि कडा कारबाही गर्न सरकारसँग माग गरेको छ।

बैठकले मोर्चामा आबद्ध घटक दलहरूको प्रतिनिधित्व रहने गरी मधेश प्रदेश समन्वय समिति पनि गठन गरेको छ।

समितिमा जसपा नेपालबाट बालकिशोर प्रसाद यादव र रामविनोद चौधरी, जनमत पार्टीबाट गजानन्द यादव र रामप्रसाद मण्डल तथा आम जनता पार्टीबाट उमेश कुशवाहा र राधेश्याम साह रहेका छन्।

त्यस्तै, नागरिक उन्मुक्ति पार्टीबाट पृथ्वीनारायण सिंह थारू र समसुल/नागेन्द्रप्रसाद चौधरी, नेपाल जनमुक्ति पार्टीबाट भुवन थापा मगर र रामएकवाल मण्डल, प्रगतिशील लोकतान्त्रिक पार्टीबाट अमिताभ बच्चन दास र किशोरी यादव तथा नेपाल संघीय समाजवादी पार्टीबाट विमला अन्सारी र सैदर अन्सारी समितिमा समेटिएका छन्।

बहुजन एकता पार्टीबाट प्रकाश महरा र सुजित महरा पनि समितिमा सदस्य रहेका छन्।

बैठकले आगामी भदौ १० गतेभित्र मधेश प्रदेशका आठवटै जिल्लामा जिल्ला समन्वय समिति गठन गर्ने निर्णय गरेको छ। त्यसका लागि घटक दलहरूलाई जिल्लागत जिम्मेवारीसमेत तोकिएको छ।

जसअनुसार सप्तरीमा जनमत पार्टी, सिरहामा बहुजन एकता पार्टी, महोत्तरीमा नेपाल जनमुक्ति पार्टी र नेपाल संघीय समाजवादी पार्टी, सर्लाहीमा नागरिक उन्मुक्ति पार्टी, रौतहटमा आम जनता पार्टी, बारामा जसपा नेपाल र आजपा, धनुषामा जसपा नेपाल तथा पर्सामा प्रगतिशील लोकतान्त्रिक पार्टीलाई जिम्मेवारी दिइएको छ।