काठमाडौं । गत आर्थिक वर्ष २०८२/८३ मा नाफा कमाएका बैंक तथा वित्तीय संस्थाका लगानीकर्ताले यस वर्षको दसैंअघि नै लाभांश पाउने सम्भावना बढेको छ।

वाणिज्य बैंकहरूले गत आर्थिक वर्षको वित्तीय विवरणको बाह्य लेखापरीक्षण सम्पन्न गर्दै लाभांश वितरणको प्रक्रिया अघि बढाएका छन्। नबिल, एभरेस्ट, सानिमा, माछापुच्छ्रे र कुमारी बैंकसँगै नेपाल इन्फ्रास्ट्रक्चर बैंक (निफ्रा)ले लाभांश घोषणाका लागि नेपाल राष्ट्र बैंकसँग पूर्वस्वीकृति मागेका छन्।

लाभांश वितरणको प्रक्रिया अघि बढाउने बैंकको संख्या बढेसँगै दसैंअघि नै लगानीकर्ताको हातमा लाभांश पुग्ने अपेक्षा गरिएको हो।

बैंकहरूले राष्ट्र बैंकबाट पूर्वस्वीकृति पाएपछि सञ्चालक समितिबाट लाभांश दर प्रस्ताव गर्नेछन्। त्यसपछि साधारणसभा आह्वान गर्नुअघि राष्ट्र बैंकबाट पुनः अन्तिम स्वीकृति लिनुपर्ने व्यवस्था छ। अन्तिम स्वीकृति प्राप्त भएपछि कम्तीमा २१ दिनको सूचना दिएर साधारणसभा बोलाउन सकिनेछ।

एभरेस्टको लाभांश क्षमता उच्च

सार्वजनिक गरिएको अपरिष्कृत वित्तीय विवरणअनुसार यसपटक लाभांश वितरण क्षमता एभरेस्ट बैंकको सबैभन्दा उच्च देखिएको छ। एभरेस्ट बैंकको लाभांश क्षमता ३८.३२ प्रतिशत रहेको छ।

त्यस्तै, सानिमा बैंकको २०.८५ प्रतिशत, नबिल बैंकको १९.१० प्रतिशत, माछापुच्छ्रे बैंकको ७.५१ प्रतिशत र कुमारी बैंकको ३.०२ प्रतिशत लाभांश क्षमता देखिएको छ।

तर वित्तीय विवरणमा देखिएको लाभांश क्षमता नै वास्तविक लाभांश दर भने होइन। कति प्रतिशत बोनस सेयर वा नगद लाभांश वितरण गर्ने भन्ने निर्णय सम्बन्धित बैंकको सञ्चालक समितिले गर्नेछ भने त्यसलाई राष्ट्र बैंकले स्वीकृति दिनुपर्नेछ।

नगद लाभांशमा जोडको सम्भावना

यसपटक बैंकहरूले बोनस सेयरभन्दा नगद लाभांशलाई प्राथमिकता दिन सक्ने अनुमान गरिएको छ। बैंकहरूको चुक्ता पुँजी पहिले नै उच्च रहेकाले पुँजी वृद्धिका लागि बोनस सेयर वितरण गर्ने दबाब कम भएको र उपलब्ध नाफाबाट नगद लाभांश दिनेतर्फ बैंकहरू केन्द्रित हुन सक्ने देखिएको हो।

यद्यपि, कुन बैंकले कस्तो दरमा बोनस वा नगद लाभांश दिने भन्ने अन्तिम निर्णय सम्बन्धित सञ्चालक समितिले गर्नेछ।

राष्ट्र बैंकको स्वीकृतिमा निर्भर

राष्ट्र बैंकले पूर्वस्वीकृति र अन्तिम स्वीकृतिको प्रक्रिया समयमै पूरा गरिदिए दसैंअघि नै केही बैंकले साधारणसभा सम्पन्न गरी लाभांश वितरण गर्न सक्नेछन्।

विकास बैंकतर्फ सांग्रिला डेभलपमेन्ट बैंक र कामना सेवा विकास बैंकले यसअघि नै लाभांशका लागि पूर्वस्वीकृति पाइसकेका छन्।

त्यसैले वाणिज्य बैंकका लगानीकर्तामाझ पनि दसैंअघि लाभांश आउने अपेक्षा बढेको छ। अब राष्ट्र बैंकको स्वीकृति, सञ्चालक समितिको निर्णय र साधारणसभा सम्पन्न हुने समयले कुन–कुन बैंकका लगानीकर्ताले दसैंअघि लाभांश पाउने भन्ने टुंगो लगाउनेछ।

Originally published on abcnews.com.np.