काठमाडौं । राष्ट्रिय स्वतन्त्र पार्टी (रास्वपा) सभापति रवि लामिछाने पछिल्लो समय पार्टी संगठन र संसदीय गतिविधिमा थप सक्रिय देखिएका छन्। प्रधानमन्त्री एवं रास्वपा संसदीय दलका नेता बालेन्द्र शाह (बालेन) पार्टीका संसदीय दलका बैठकमा नियमित सहभागी हुन छाडेपछि लामिछानेले सांसद तथा मन्त्रीहरूसँग समन्वय र राजनीतिक गतिविधिमा सक्रियता बढाएका हुन्। पछिल्लो संसदीय दलको बैठकमा पनि प्रधानमन्त्री शाह अनुपस्थित थिए।

गत भदौ ३ गते लामिछानेले रास्वपाका सांसद तथा मन्त्रीहरूसँग संयुक्त छलफल गर्दै संसद्मा मर्यादित र प्रभावकारी भूमिका खेल्न निर्देशन दिएका थिए। उनले पार्टीलाई विगतको हिसाबकिताबमा अल्झाउनुभन्दा आगामी ३५ वर्षका लागि योजना बनाएर अघि बढ्न र गाउँ, टोल तथा बस्तीमा पुगेर संगठन विस्तार गर्न आग्रह गरेका थिए।

मधेसमा संगठन सुदृढ गर्ने तयारी

पार्टी सभापति लामिछानेले भदौ १० गतेपछि मधेस प्रदेशका जिल्लाको भ्रमण गर्ने तयारी गरेका छन्। रास्वपाले मधेस प्रदेशको अधिवेशन पूरा नगरी केन्द्रीय महाधिवेशन सम्पन्न गरेको र पर्साबाहेक अन्य जिल्लामा अधिवेशन हुन नसकेको अवस्थामा संगठन निर्माणलाई गति दिन उनी आफैँ मधेस जान लागेका हुन्।

लामिछानेले मधेसका सांसदसँग यस विषयमा यसअघि नै छलफल गरिसकेको र अधिवेशनको वातावरण बनाउन आफू जिल्ला–जिल्लामा जाने जानकारी गराएका छन्। पार्टीका नेताहरूका अनुसार भ्रमणका क्रममा संगठन विस्तार, कार्यकर्ता परिचालन तथा पार्टी प्रवेश कार्यक्रमसमेत सञ्चालन गर्ने तयारी छ।

मधेसमा घट्दो प्रभावप्रति चिन्ता

२०८२ को प्रतिनिधिसभा निर्वाचनमा रास्वपाले मधेस प्रदेशमा उल्लेख्य सफलता हासिल गरे पनि पछिल्लो समय पार्टीप्रतिको जनधारणाबारे संगठनभित्रै चिन्ता बढेको नेताहरू बताउँछन्।

मधेसबाट निर्वाचित केही सांसदले सरकारको कार्यशैली र पार्टीको संगठनात्मक अवस्थाबारे नेतृत्वसमक्ष प्रश्न उठाउँदै आएका छन्। यसै पृष्ठभूमिमा लामिछानेले मधेस भ्रमणलाई संगठन सुदृढीकरणसँग जोडेको बताइएको छ।

मधेसमा पार्टीको सांगठनिक संरचना अझै पूर्ण रूपमा व्यवस्थित हुन नसकेको विषयलाई पनि उनले प्राथमिकतामा राखेका छन्। भ्रमणका क्रममा स्थानीय नेता–कार्यकर्ता तथा समर्थकसँग प्रत्यक्ष संवाद गरी समस्या पहिचान गर्ने तयारी रहेको बताइएको छ।

प्रधानमन्त्री बालेन र रविबीच फरक भूमिका

रास्वपाको संरचनामा सभापति लामिछाने र प्रधानमन्त्री शाहको भूमिका अलग भए पनि पछिल्लो समय पार्टीका आन्तरिक बैठकमा शाहको अनुपस्थिति देखिँदै आएको छ। प्रधानमन्त्री बनेपछि पार्टीका नियमित बैठक तथा प्रशिक्षणका कार्यक्रममा पनि उनी धेरैपटक सहभागी नभएको सार्वजनिक विवरणहरूमा उल्लेख छ।

यसको विपरीत लामिछानेले संसद्, संगठन र पार्टीका आन्तरिक गतिविधिमा सक्रियता बढाएका छन्। उनले सरकारका कामकारबाहीबारे पार्टीका सांसद र नेताहरूले जनतासमक्ष जवाफ दिन सक्ने गरी तयारी गर्नुपर्नेमा समेत जोड दिँदै आएका छन्।

रास्वपाभित्र सरकार सञ्चालन र पार्टी संगठनबीच प्रभावकारी समन्वय कसरी गर्ने भन्ने बहस भइरहेका बेला लामिछानेको सक्रियताले पार्टी राजनीतिमा उनको भूमिकालाई थप केन्द्रमा ल्याएको छ। मधेस भ्रमण र संगठन विस्तारको अभियानले पार्टीभित्र देखिएका असन्तुष्टि तथा सांगठनिक कमजोरी कति सम्बोधन गर्छ भन्ने भने आगामी गतिविधिले देखाउनेछ।

Originally published on abcnews.com.np.