काठमाडौं । रसुवाको भोटेकोशी नदीमा ठूलो बाढी आएपछि राष्ट्रिय विपद् जोखिम न्यूनीकरण तथा व्यवस्थापन प्राधिकरणले त्रिशूली नदी आसपासका तटीय क्षेत्रका बासिन्दालाई उच्च सतर्कता अपनाउन आग्रह गरेको छ।

रसुवा जिल्ला प्रशासन कार्यालयका अनुसार भोटेकोशी नदीमा पानीको बहाव असामान्य रूपमा बढेको छ। तिब्बततर्फबाट आएको ठूलो बाढी नदीमा प्रवेश गरेपछि रसुवा हुँदै नुवाकोट, धादिङ, गोरखा र चितवनसम्मका नदी तटीय क्षेत्रमा जोखिम बढेको बताइएको छ।

प्राधिकरणले रसुवा, नुवाकोट, धादिङ, गोरखा र चितवन जिल्ला भएर बग्ने त्रिशूली नदी तथा यससँग जोडिएका नदी किनारका बासिन्दालाई अर्को सूचना जारी नभएसम्म विशेष सावधानी अपनाउन अनुरोध गरेको छ।

प्राधिकरणका कार्यकारी प्रमुख धर्मराज उप्रेतीले तिब्बततर्फबाट भोटेकोशी नदीमा ठूलो बाढी प्रवेश गरेको जानकारी दिँदै त्रिशूली नदीको तटीय क्षेत्र, विशेषगरी मुग्लिनसम्मका बासिन्दालाई सुरक्षित स्थानमा रहन आग्रह गरेका छन्।

उनले भनेका छन्, “भोटेकोशी नदीमा रसुवा हुँदै तिब्बततर्फबाट ठूलो बाढी प्रवेश गरेकोले अर्को सूचना नआउँदासम्म त्रिशूली नदीको तटीय क्षेत्र, मुग्लिनसम्म उच्च सतर्कतासहित सुरक्षित स्थानमा रहन अनुरोध छ।”

बाढीको कारणबारे विभिन्न आशंका गरिए पनि हालसम्म आधिकारिक रूपमा यकिन हुन सकेको छैन। तिब्बत क्षेत्रमा हिमताल विस्फोट वा अन्य प्राकृतिक घटनाका कारण अचानक ठूलो बाढी आएको हुन सक्ने आशंका गरिएको छ।

तर, प्राधिकरणले तिब्बत पक्षबाट यस सम्बन्धमा औपचारिक विवरण प्राप्त नभएको जनाएको छ। बाढीको वास्तविक कारण, पानीको बहाव र सम्भावित क्षतिको विवरण बुझ्ने काम भइरहेको छ।

स्थानीय प्रशासनलाई तयारी अवस्थामा रहन निर्देशन

प्राधिकरणले स्थानीय प्रशासन, सुरक्षा निकाय र विपद् व्यवस्थापनसँग सम्बन्धित निकायलाई उच्च सतर्कतामा रहन आग्रह गरेको छ।

नदी किनार तथा सम्भावित बाढी प्रभावित क्षेत्रमा रहेका नागरिकलाई आवश्यक परे सुरक्षित स्थानमा स्थानान्तरण गर्ने तयारी भइरहेको जनाइएको छ। प्राधिकरणले नदी किनारमा नजान, अनावश्यक यात्रा नगर्न र स्थानीय प्रशासन तथा आधिकारिक निकायबाट जारी सूचना र चेतावनीको पालना गर्न आग्रह गरेको छ।

बाढीबाट भएको सम्भावित मानवीय तथा भौतिक क्षतिको विस्तृत विवरण भने आउन बाँकी रहेको छ।

Originally published on abcnews.com.np.