काठमाडौँ । रसुवा जिल्लामा आएको बाढी तथा पहिरोमा परी ८२६ जना अझै सम्पर्कविहीन रहेको गृह मन्त्रालयअन्तर्गतको विपद् पूर्वतयारी तथा प्रतिकार्य शाखा (एनईओसी) ले जनाएको छ।

एनईओसीका अनुसार बिहीबार बिहान ८ः४५ बजेसम्मको विवरणमा सम्पर्कविहीन हुनेमा नेपाली सेनाका ४४, नेपाल प्रहरीका २८ र सशस्त्र प्रहरी बलका १३ जना रहेका छन्।

त्यस्तै, रसुवाका १६१ जना, नुवाकोटका एक जना तथा विभिन्न स्थानका ५७९ पर्यटक सम्पर्कविहीन छन्। सम्पर्कविहीन पर्यटकमध्ये ११३ नेपाली र ४६६ विदेशी नागरिक रहेका छन्।

१०४ जनाको उद्धार

बाढी तथा पहिरोमा फसेका १०४ जनाको उद्धार गरिएको छ। रसुवाबाट ४३, नुवाकोटबाट ५८ र धादिङबाट तीन जनालाई सुरक्षित स्थानमा ल्याइएको एनईओसीले जनाएको छ।

१६५ शव फेला

विभिन्न जिल्लामा गरी हालसम्म १६५ वटा शव फेला परेका छन्।

• चितवन — ६४
• नवलपरासी पूर्व — २६
• धादिङ — २७
• गोरखा — २०
• नुवाकोट — १२
• तनहुँ — ९
• नवलपरासी पश्चिम — ५
• रसुवा — २

चितवनमा फेला परेका अधिकांश शव नारायणी नदी किनारबाट भेटिएका हुन्। केही शवको पहिचान हुन बाँकी रहेको जनाइएको छ।

७३ जना घाइते

बाढी तथा पहिरोमा परी ७३ जना घाइते भएका छन्। घाइतेमध्ये रसुवाका ४३, नुवाकोटका २७ र धादिङका तीन जना रहेका छन्।

खोज तथा उद्धारका लागि नेपाल प्रहरीका ३ हजार ३१५ र सशस्त्र प्रहरी बलका १ हजार २३७ जनशक्ति परिचालन गरिएको छ। उद्धारमा नेपाली सेनाका ६ र सशस्त्र प्रहरीका ९ वटा हेलिकोप्टर समेत प्रयोग भइरहेको एनईओसीले जनाएको छ।

Originally published on abcnews.com.np.