काठमाडौं । बाढीका कारण विद्युत् सेवा प्रभावित बनेका नुवाकोटका विभिन्न क्षेत्रमा नेपाल विद्युत् प्राधिकरणले वैकल्पिक प्रसारण व्यवस्थामार्फत विद्युत् आपूर्ति पुनः सुचारु गरेको छ।

प्राधिकरणका अनुसार खरानीटार, समुन्द्रटार, चौगाडा, लिखु, पञ्चकन्या र विदुरलगायत क्षेत्रमा सिन्धुपाल्चोकबाट वैकल्पिक लाइनमार्फत विद्युत् आपूर्ति व्यवस्था मिलाइएको हो।

प्राधिकरणका प्रवक्ता राजन ढकालका अनुसार चपली सबस्टेसनबाट चपली–देवीघाट ६६ केभी लाइनलाई ११ केभीमा चार्ज गर्ने तथा बालाजु–त्रिशूली ६६ केभी लाइनलाई ११ केभीमा चार्ज गर्ने काम भइरहेको छ। आवश्यक प्राविधिक काम पूरा गरी ती लाइन पनि सञ्चालनमा ल्याउने तयारी भइरहेको उनले बताए।

प्राधिकरणले आज साँझसम्म विद्युत् सेवा थप नियमित बनाउने प्रयास भइरहेको जनाएको छ।

त्रिशूली क्षेत्रमा पनि वैकल्पिक आपूर्ति

त्रिशूली क्षेत्रका केही स्थानमा धादिङको सल्यानटार सबस्टेसनमार्फत विद्युत् आपूर्ति गर्ने वैकल्पिक व्यवस्था गरिएको छ।

बाढीबाट नियमित प्रसारण संरचनामा क्षति पुगेपछि प्रभावित क्षेत्रमा वैकल्पिक स्रोत प्रयोग गरी विद्युत् सेवा सञ्चालनमा ल्याउने काम भइरहेको प्राधिकरणले जनाएको छ।

प्राविधिक टोली परिचालन

विद्युत् सेवा यथाशीघ्र नियमित बनाउन प्राधिकरणले काठमाडौं तथा आसपासका क्षेत्रबाट दक्ष प्राविधिक जनशक्ति, उपकरण र आवश्यक स्रोतसाधनसहितका टोली नुवाकोटमा परिचालन गरेको छ।

टोलीले बाढीबाट क्षतिग्रस्त विद्युत् संरचनाको निरीक्षण, मर्मत तथा वैकल्पिक विद्युत् आपूर्ति व्यवस्थापनलाई प्राथमिकताका साथ अघि बढाइरहेको छ।

Originally published on abcnews.com.np.