रसुवा । प्रधानमन्त्री बालेन्द्र शाहले रसुवाको भोटेकोसी क्षेत्रमा बुधबार आएको विनाशकारी बाढीपछिको विपत्तिको सामना सरकार, नागरिक, अन्तर्राष्ट्रिय समुदाय तथा विश्वभर रहेका नेपालीको सहयोग र सहकार्यमा मिलेर गरिरहेको बताएका छन्।

बिहीबार बिहान सामाजिक सञ्जालमार्फत जानकारी दिँदै प्रधानमन्त्री शाहले बिहानैदेखि उद्धार अभियानलाई तीव्र बनाइएको बताएका छन्। उनका अनुसार नेपाली सेनाले सञ्चालन गरेको उद्धार अभियानमार्फत रसुवाको टिमुरेबाट ११६ जनालाई सकुशल उद्धार गरिएको छ।

उद्धार गरिएकामध्ये ९५ जना नेपाली र २१ जना भारतीय नागरिक रहेका छन्। यसैक्रममा एउटा टनेलमा फसेका सात जना नेपाली नागरिकलाई समेत सुरक्षित रूपमा उद्धार गरिएको प्रधानमन्त्री शाहले जानकारी दिएका छन्।

प्रधानमन्त्रीका अनुसार बिहीबार बिहान ६ः३० बजेदेखि उद्धारका लागि हवाई उडान सुरु गरिएको छ। अहिलेसम्म १५ भन्दा बढी उडान सम्पन्न भइसकेका छन् भने थप हेलिकोप्टर उद्धारका लागि तयारी अवस्थामा राखिएको उनले बताएका छन्।

राहत सामग्रीसहित प्रभावित क्षेत्रमा राज्य संयन्त्र परिचालित

प्रभावित क्षेत्रमा अत्यावश्यक राहत सामग्री द्रुत रूपमा पुर्‍याउने काम भइरहेको प्रधानमन्त्री शाहले बताएका छन्। उनका अनुसार उद्धार तथा राहत कार्यलाई प्रभावकारी बनाउन जेनेरेटर, पोर्टेबल मोबाइल टावर, मेडिकल सामग्री, टेन्ट तथा फलाम–ढुङ्गा काट्ने मेसिन लगायतका आवश्यक सामग्री प्रभावित क्षेत्रमा पठाइँदैछ।

‘अत्यावश्यक सहयोग सामग्रीहरू द्रुत रूपमा पुर्‍याउने काम भइरहेको छ,’ प्रधानमन्त्रीले भनेका छन्।

अस्थायी सञ्चार सेवा र शिविरको तयारी

बाढी प्रभावित क्षेत्रमा सञ्चार सम्पर्क पुनःस्थापित गर्न अस्थायी मोबाइल नेटवर्क र मोबाइल चार्जिङको व्यवस्था गरिने प्रधानमन्त्री शाहले बताएका छन्। यसबाट प्रभावित नागरिक र उद्धार टोलीबीच सम्पर्क स्थापित गर्न सहयोग पुग्ने अपेक्षा गरिएको छ।

यसैबीच, नुवाकोटमा अस्थायी शिविर तयार गरिएको र त्यहाँ प्रभावित नागरिकका लागि खाना तथा पानीको व्यवस्था मिलाइएको प्रधानमन्त्रीले जानकारी दिएका छन्।

प्रभावित क्षेत्रको अवस्थाबारे विस्तृत जानकारी लिन ड्रोनमार्फत सर्वेक्षण पनि भइरहेको छ। प्रधानमन्त्रीका अनुसार ड्रोन सर्वेबाट विभिन्न स्थानको विवरण सङ्कलन गर्ने काम अन्तिम चरणमा पुगेको छ, जसले उद्धार तथा राहत कार्यलाई थप चुस्त बनाउन सहयोग गर्नेछ।

सिकिस्त बिरामी, वृद्ध, महिला र बालबालिकालाई प्राथमिकता

हेलिकोप्टरमार्फत गरिने उद्धारमा सिकिस्त घाइते, वृद्धवृद्धा, महिला तथा बालबालिकालाई प्राथमिकता दिइने प्रधानमन्त्री शाहले बताएका छन्।

उनले प्रभावित नागरिकलाई धैर्य र संयम अपनाउन आग्रह गर्दै उद्धार तथा राहतका लागि राज्यको सम्पूर्ण संयन्त्र परिचालित रहेको बताएका छन्।

‘सम्पूर्णमा धैर्य तथा संयम राखी उद्धार तथा राहतको प्रतीक्षा गर्नुहुन र यो विपद्को सामना गर्न अनुरोध गर्दछौँ। यथाशीघ्र उद्धारका लागि राज्यको सम्पूर्ण संयन्त्र परिचालित छन्,’ प्रधानमन्त्रीले भनेका छन्।

प्रधानमन्त्री शाहले देश अहिले गम्भीर विपत्तिको घडीबाट गुज्रिरहेको उल्लेख गर्दै सबै पक्ष एकजुट भएर संकटको सामना गर्नुपर्नेमा जोड दिएका छन्।

‘आशा र विश्वासका साथ हामी सबै एक भएर यो विपद्को डटेर सामना गर्नुपर्नेछ,’ उनले भनेका छन्, ‘यस क्रममा हातेमालो गर्नुहुने सम्पूर्णमा हार्दिक धन्यवाद।’

Originally published on abcnews.com.np.