काठमाडौं । पृथ्वी राजमार्गअन्तर्गत धादिङको गल्छी–बैरेनी सडकखण्डमा बिहीबार बेलुकादेखि एकतर्फी रूपमा यातायात सञ्चालनमा आएको छ।

सडक विभागका अनुसार राजमार्गको जरिखेत क्षेत्रमा बाढीले पुल बगाउनुका साथै सडकमा ठूलो मात्रामा माटो, ढुंगा र गेग्रान थुपारेपछि यातायात अवरुद्ध भएको थियो। अहिले उक्त क्षेत्रमा थुप्रिएको माटो तथा गेग्रान हटाएर एकतर्फी रूपमा सवारीसाधन सञ्चालनमा ल्याइएको हो।

जरिखेत क्षेत्रमा यातायात सञ्चालनमा आएपछि अब मलेखुतर्फका पोखरी, बाँगे र गलौंदी क्षेत्रमा जम्मा भएको लेदो तथा गेग्रान हटाउने काम सुरु गरिएको विभागले जनाएको छ।

विभागका अनुसार ती तीन क्षेत्रमा करिब ७ सय मिटर सडकमा थुप्रिएको लेदो हटाउन बाँकी रहेको छ। पोखरी, बाँगे र गलौंदी क्षेत्रमा सडक सफा गर्ने काम शुक्रबार बेलुकासम्म पूरा हुने अनुमान गरिएको छ।

उक्त कार्य सम्पन्न भएपछि पृथ्वी राजमार्ग पूर्ण रूपमा सञ्चालनमा आउने सडक विभागले जनाएको छ।

गत भदौ १० गते आएको भीषण बाढीका कारण पृथ्वी राजमार्गका विभिन्न स्थानमा क्षति पुगेको थियो। विशेषगरी जरिखेत क्षेत्रमा बाढीले पुल बगाउनुका साथै सडकमा माटो, ढुंगा र गेग्रान थुपार्दा राजमार्ग पूर्ण रूपमा अवरुद्ध भएको थियो।

राजमार्ग अवरुद्ध भएपछि सडक विभागले तत्कालै सडक सफाइ तथा अवरोध हटाउने काम सुरु गरेको थियो। अहिले पनि प्रभावित क्षेत्रमा डोजर तथा अन्य उपकरण परिचालन गरी सडक सञ्चालनलाई पूर्णता दिने काम भइरहेको विभागले जनाएको छ।

Originally published on abcnews.com.np.