काठमाडौं । नेकपाका नेता वर्षमान पुनले भोटेकोशी बाढीबाट प्रभावित नुवाकोटको विदुर क्षेत्रको स्थलगत निरीक्षण गरेका छन्।

पुनसहित नेकपाका प्रमुख सचेतक युवराज दुलाललगायतको टोलीले बाढी प्रभावित क्षेत्रको अवस्था, क्षति तथा उद्धार र राहत कार्यबारे जानकारी लिएको हो।

निरीक्षणका क्रममा गृहमन्त्री सुधन गुरुङ, नुवाकोटका प्रमुख जिल्ला अधिकारी तथा सम्बन्धित निकायका अधिकारीहरूसँग उद्धार, राहत र पुनःस्थापनाका विषयमा छलफल भएको पुनले जानकारी दिए।

पुनले विपद्को कठिन घडीमा प्रभावित नागरिकको जीवनरक्षा र तत्काल राहतलाई पहिलो प्राथमिकतामा राख्न गृहमन्त्रीको ध्यानाकर्षण गराएका छन्।

त्यस क्रममा उनले रसुवागढी क्षेत्रमा सम्पर्कविहीन रहेका रोल्पाका २५ जनासहित सबै बेपत्ता नागरिकको तीव्र खोजी तथा उद्धार गर्न सम्बन्धित निकायलाई आग्रह गरेका छन्।

‘विपद्को पीडामा रहेका परिवारलाई आशा र भरोसा दिलाउनु राज्यको दायित्व हो,’ पुनले भने, ‘हराइरहेका आफन्तहरूको सकुशल उद्धारका लागि खोजी तथा उद्धार कार्यलाई अझ तीव्र बनाउन निरन्तर पहल र समन्वय गर्नेछु।’

उनले प्रभावित नागरिकको सुरक्षित पुनःस्थापना तथा राहत वितरणलाई प्रभावकारी बनाउन राज्यका सबै संयन्त्र परिचालन गर्नुपर्नेमा समेत जोड दिएका छन्।

Originally published on abcnews.com.np.