काठमाडौं । राष्ट्रिय स्वतन्त्र पार्टी (रास्वपा) ले बाढी तथा विपद् प्रभावित नागरिकका लागि पहिलो चरणमा ५० लाख रुपैयाँ सहयोग गर्ने निर्णय गरेको छ।

रास्वपाले विपद्को समयमा पार्टीको सम्पूर्ण संरचनालाई परिचालन गर्दै सरकारलाई सहयोग गर्ने निर्णय गरेको महामन्त्री विपिन आचार्यले जानकारी दिए।

निर्णय सार्वजनिक गर्दै आचार्यले पार्टीका सबै तहका संरचनालाई समन्वय गरी एकीकृत रूपमा राहत तथा उद्धारमा परिचालन गर्ने बताए।

“विपद्मा पार्टीको सम्पूर्ण संरचनाको तर्फबाट पहिलो चरणमा ५० लाख सहयोग गर्ने।”

उनका अनुसार पार्टीका सबै संरचनाका नेता तथा कार्यकर्तालाई एकीकृत रूपमा परिचालन गरिनेछ। पार्टीको संरचना सरकारसँग जोडिएर राहत, उद्धार तथा पुनर्स्थापनाका काममा सहयोग गर्ने रास्वपाको निर्णय छ।

एकद्वार प्रणालीबाट राहत वितरण

रास्वपाले राहत तथा उद्धारका काम राज्यको संरचनामार्फत एकद्वार प्रणालीबाट सञ्चालन गर्नुपर्नेमा जोड दिएको छ।

पार्टीले राहत वितरणमा दोहोरोपन तथा अव्यवस्था हुन नदिन सरकारी संयन्त्रसँग समन्वय गरेर काम गर्ने जनाएको छ।

त्यसैगरी राहत, उद्धार तथा पुनर्स्थापनाका लागि आवश्यक सहयोग जुटाउनसमेत पार्टीले ‘मियो’ बनेर समन्वय गर्ने निर्णय गरेको छ।

‘सरकारले तदारुकता देखाएको छ’

महामन्त्री आचार्यले विपद् लगत्तै सरकारले तदारुकता देखाएर काम अघि बढाएको भन्दै त्यसको स्वागत गरे।

“विपद् हुनेबित्तिकै सरकारले तदारुकता देखाएको छ। यसका लागि स्वागत गर्दै रास्वपाले मियो बनेर समन्वय गर्ने र विपद्बाट बाहिर निकाल्न ऐक्यबद्धता कायम गर्ने।”

रास्वपाले विपद्बाट प्रभावित नागरिकलाई तत्काल राहत उपलब्ध गराउनेदेखि दीर्घकालीन पुनर्स्थापनासम्मका काममा सरकारसँग समन्वय र सहकार्य गर्दै पार्टीको सम्पूर्ण संरचना परिचालन गर्ने जनाएको छ।

Originally published on abcnews.com.np.