बुटवल, २९पुस । नेकपा एमालेका उपमहासचिव तथा रुपन्देही क्षेत्र नम्बर ३ का प्रतिनिधिसभा सदस्य घनश्याम भुसालले मुलुकको समृद्धिका लागि राजनीतिक भ्रष्टाचार अन्त्य हुनुपर्ने बताउनु भएको छ ।
रुपन्देही उद्योग संघको ३९ औ साधारणसभाको तथा २० औं अधिवेशन उदघाटन सत्रलाई सम्बोधन गर्दै उपमहासचिव भुसालले राजनीतिमा भ्रष्टाचार मौलाएका कारण मुलुकले गति लिन नसकेको दाबी गर्नुभयो ।
उहांले भ्रष्टाचारको अन्त्य, स्थिर सरकार र आर्थिक समृद्धिका लागि बाम गठबन्धन बनाउनु परेको बताउनुभयो । समृद्धिको एउटा मात्र बाटो उद्योग भएको भन्दै भुसालले बाम गठबन्धनले समृद्धिका लागि उद्योग राजनीति गर्नुपर्ने बताउनुभयो ।
राजनीतिमा रहेको भ्रष्टाचारको अन्त्य नभएसम्म कर्मचारीतन्त्र भित्रको भ्रष्ट्राचारको अन्त्य नहुने भन्दै भुसालले दलका नेताहरुले आफूबाटै यसको सुरुवात गर्नुपर्नेमा जोड दिनुभयो । अख्तियार, न्यायालय जस्ता निकायमा समेत दलीय आधारमा नियुक्ती हुँदा राजनीतिक भ्रष्ट्राचारको अन्त्य हुन नसकेको र त्यसरी गरिएका नियुक्तीहरुमा राजनीतिक सौदाबाजी हुने गरेको भुसालले आरोप लगाउनु भयो ।
कार्यक्रममा बोल्दै नेपाल उद्योग परिसंघका केन्द्रीय उपाध्यक्ष कृष्ण अधिकारीले उद्योगमैत्री नीतिको अभावमा मुलुकका उद्योगधन्धाहरु संकटमा परेको र उत्पादन बढाउन नसकेको उल्लेख गर्दै उद्योग धन्धाहरुलाई राज्यको संरक्षण हुनुपर्नेमा जोड दिनुभयो ।
रुपन्देही उद्योगसंघका अध्यक्ष दिनेशराज रेग्मीले उद्यमशिलताको बिकास गर्न उद्योग संघले बिभिन्न कार्य गर्ने गरेको बताउनुभयो ।
कार्यक्रममा बोल्दै प्रदेशसभाका सदस्यहरु भोजप्रसाद श्रेष्ठ, दधिराम न्यौपाने, डा. कृष्ण न्यौपाने र तुलसी चौधरीले बाम गठबन्धनको साझा घोषणापत्रले समेटेका मुद्दालाई कार्यान्वयन गर्न सके मात्रै मुलुक समृद्धिको युगमा प्रवेश गर्ने उल्लेख गरेका थिए ।
अधिवेशनले आगामी कार्यकालकालागि नयां नेतृत्व चयन गर्नेछ । नयां नेतृत्वकालागि वर्तमान बरिष्ठ उपाध्यक्ष गणेश अधिकारी र सल्लाहकार सुनिल श्रेष्ठ प्यानल सहित प्रतिस्पर्धा गरिरहेकाछन् ।
प्रतिक्रिया दिनुहोस्