काठमाडौं, २३ माघ । प्रदेश नम्बर २ मा आलोपालो सरकार चलाउने प्रस्ताव राष्ट्रिय जनता पार्टी नेपाल (राजपा)ले संघीय समाजवादी फोरम नेपाल समक्ष राखेको छ।

प्रदेशसभामा दुवै दलको हैसियत केही सिटले मात्र तल(माथि रहेकाले प्रदेश सरकारको नेतृत्व समेत आलोपालो रुपमा गर्ने प्रस्ताव राजपा अध्यक्ष मण्डलका नेताहरुले राखेका छन्।

तर फोरम अध्यक्ष उपेन्द्र यादवले आलोपालो सरकार गठन गर्ने राजपाको प्रस्ताव स्वीकार गर्न नसकिने बताएका छन् । चुनाव अगाडि भएको सहमति अनुसार पहिलो बन्ने दलले मुख्यमन्त्री र दोस्रो दलले सभामुख लगायतको पद बाँडफाँट गर्नुपर्ने धारणा यादवले राखेका छन्।

‘यसअघि नै आलोपालोको प्रस्तावमा मैले नाइँ भनिसकेको छु, सरकारको नेतृत्व बाँडफाँट गर्ने विषयमा सहमति हुन सक्दैन’, यादवले भने।

राजपाले पार्टीभित्र छलफल गरेर अघि बढ्ने प्रस्ताव गरेपछि जनकपुरमा मंगलबार बसेको दुई दलको बैठक बिना निष्कर्ष टुङगिएको छ।

निर्वाचन भएको झन्डै दुई महिनापछि दुई दल प्रदेश नम्बर २ को सरकार गठनमा औपचारिक छलफलमा जुटेका हुन्।

सरकार गठनका लागि राजपाले यसअघि राख्दै आएको छलफलको प्रस्तावलाई फोरमले टार्दै आएको थियो।