काठमाडौं, १ फागुन । प्रदेश नम्बर ५ को सभामुख माओवादी केन्द्रका पूर्णबहादुर घर्ती बन्ने निश्चित भएको छ । वाम गठबन्धनका संयुक्त उमेद्वार घर्तीले प्रदेशसभा संसद सचिवालयमा मंगलबार उम्मेदवारी दर्ता गराएका छन् ।

माओवादी केन्द्रका प्रमुख सचेतक दधिराम न्यौपानेको प्रस्ताव र एमाले प्रमुख सचेतक भूमिश्वर ढकालको समर्थनमा उम्मेदवारी दर्ता भएको हो ।

प्रदेश नम्बर ५ मा वाम गठबन्धनको बहुमत छ । ८७ प्रदेशसभा सदस्य रहेकोमा गठबन्धनसँग ६१ सांसद छन् । संसदको तेश्रो शक्ति कांग्रेस र अरु दलहरुले सभामुखमा उम्मेदवारी दिने तयारी गरेका छैनन् ।

रुकुम पूर्वबाट निर्वाचित घर्तीलाई प्रदेश ५ को सभामुखको उम्मेदवार बनाउने माओवादी केन्द्रले निर्णय गरेको थियो ।

उम्मेदवारी दर्तापछि पत्रकारसँग कुरा गर्दै घर्तीले प्रदेशसभालाई व्यवस्थित, मर्यादित र विवादरहित ढंगले सञ्चालन गर्ने बताए । उनले प्रदेश ५ लाई समृद्ध बनाउनका लागि सबै दलहरुलाई एकैसाथ लिएर अघि बढ्ने उल्लेख गरे ।