काठमाडौं । शिक्षा, विज्ञान तथा प्रविधिमन्त्री विद्या भट्टराईले त्रिभुवन विश्वविद्यालय (त्रिवि)मा गुण्डागर्दी बढेको भन्दै गृहमन्त्री रमेश लेखकसँग सुरक्षाको जोडदार माग गरेकी छन् ।

त्रिवि पदाधिकारीहरुमाथि हमला गर्न खोज्ने, प्राध्यापकहरुलाई धम्की दिएको भन्दै शिक्षामन्त्री भट्टराईले त्रिविमा सुरक्षाका लागि व्यवस्थित प्रवन्ध गर्न गृहमन्त्रीसँग माग गरेका हुन् ।

‘गुण्डागर्दी गर्ने छुट कसैलाई छैन’ सामाजिक सञ्जाल फेसबुकमा उनले लेखेकी छन्, ‘यस्तो क्रियाकलापमा संग्लग्न व्यक्तिहरुलाई कानूनी दायरामा ल्याई कारवाही गर्न समेत म गृहमन्त्रालयलाई गम्भिरताकासाथ अनुरोध गर्दछु ।’

फेसबुकमा उनले लेखेका छन्, ‘त्रिभुवन विश्वविद्यालयमा केही दिनदेखि पदाधिकारीहरु माथि हमला गर्न खोज्ने र प्राध्यापकहरुलाई फोन गर्दै धम्कि दिने गरेको कारण सिङ्गो विश्वविद्यालय असुरक्षित बनेको छ । त्रिभुवन विश्वविद्यालयमा सुरक्षाका लागि व्यवस्थित प्रबन्ध गर्न म गृहमन्त्रीसँग जोडदार माग गर्दछु । गुण्डागर्दी गर्ने छुट कसैलाई छैन । यस्तो क्रियाकलापमा संग्लग्न व्यक्तिहरुलाई कानूनी दायरामा ल्याई कारवाही गर्न समेत म गृहमन्त्रालयलाई गम्भिरताकासाथ अनुरोध गर्दछु ।’

केही दिनदेखि त्रिविमा नेविसंघ आवद्ध विद्यार्थीहरुले गुण्डागर्दी शैलीमा त्रिवि पदाधिकारीलाई धम्क्याउने, धम्की दिने लगायतका गतिविधि गरेको भन्दै व्यापक विरोध जनाउँदै आएको छ । गृहमन्त्री लेखकले त्यस्ता गुण्डागर्दीलाई छुट दिएको भन्दै गृहमन्त्रीको व्यापक आलोचना समेत हुँदै आएको छ ।

शिक्षामन्त्रीले सामाजिक सञ्जालमार्फत नै सुरक्षाको माग गरेपछि ‘आवेग’मा यस्तो लेखिएको टिप्पणी भएका थिए । तर आफूले कुनै आवेगमा आएर नलेखेको उनले स्पष्ट पारेकी छन् ।

विगत पाँच दिनदेखि लगातार समन्वय गर्दा पनि धम्की दिने काम नहटेपछि सार्वजनिक अपिल गर्नुपर्ने भएरै आफूले सामाजिक सञ्जालमा लेखेको स्पष्ट पारेकी छन् ।

उनले फेसबुकमा लेखेकी छन्, ‘यहाँहरुले मलाई महत्वपूर्ण सुझाव दिनु भएकोमा आभारी छु । मैले सार्बजनिक अपिल गर्नु पर्ने भएर नै गरेको हुँ । कुनै आवेगमा आएर लेखेको होइन । विगत ५ दिन देखि लगातार सम्पर्क र समन्वय गरेको कुरा समेत जानकारी गराउन चाहन्छु ।’