म्याग्दी। उत्तर–दक्षिण जोड्ने राष्ट्रिय गौरवको कालीगण्डकी करिडोरको बेनी–जोमसोम सडकखण्डका विभिन्न स्थानमा पहिरो नियन्त्रण गरी सडक स्तरोन्नति योजना सञ्चालन गरिएको छ।

बेनी–जोमसोम–कोरला सडक आयोजनाले म्याग्दी खण्डको गलेश्वरदेखि वैँसरी र वैँसरीदेखि रातोपानी खण्डका विभिन्न स्थानमा पहिरो नियन्त्रण गरी सडक फराकिलो बनाउने तथा स्तरोन्नतिको काम थालेको हो।

यसअघि सडक निर्माणका क्रममा पहिरोका कारण ठेक्काबाट हटाइएका खण्डहरूमा पहिरो नियन्त्रण गरेर सडक फराकिलो बनाउने, कल्भर्ट निर्माण गर्ने, ग्याबिन जाली लगाउने, पक्की पर्खाल निर्माण गर्ने तथा सडक ढलान गर्ने काम भइरहेको आयोजनाका प्रमुख तेजस्वी शर्माले जानकारी दिनुभयो।

आयोजनाका इन्जिनियर तथा सूचना अधिकारी बाबुसाहेबकुमार बैठाले दिनुभएको जानकारी अनुसार गलेश्वरदेखि रातोपानीसम्म दुई प्याकेजमा ठेक्का सम्झौता गरी सडक स्तरोन्नति थालिएको छ।

गलेश्वरदेखि वैँसरीसम्मका विभिन्न स्थानमा सडक स्तरोन्नति तथा ढलानका लागि गुरुङ शङ्करश्री क्रियटिभ जेभीसँग सात करोड ३० लाख रुपियाँमा गत वैशाखमा ठेक्का सम्झौता भएको थियो। अहिले निर्माण व्यवसायी कार्यस्थलमा परिचालन भई सडक निर्माण थालिएको छ। यो खण्डअन्तर्गत तिल्केनी, राउपारे र वैँसरीमा गरी एक किलोमिटर दुई सय मिटर सडक ढलान र विभिन्न स्थानमा गरी दुई हजार तीन सय घनमिटर ग्याबिन, प्लम र कङ्क्रिट पर्खाल लगायतका संरचना निर्माण गरिने छ।

यसैगरी वैँसरीदेखि अन्नपूर्ण गाउँपालिकाको रातोपानीसम्मको सडक स्तरोन्नतिका लागि कालीमाता–थापाकाजी–रासुवा जेभीसँग आठ करोड रुपियाँमा ठेक्का सम्झौता गरी काम थालिएको छ। यसअन्तर्गत वैँसरी, महरभीर, भीरकाटे र रातोपानी खण्डमा सडक स्तरोन्नति गरी ढलान गर्न लागिएको छ। यसै खण्डमा पर्ने भीरकाटेमा विस्फोटक पदार्थ प्रयोग गरी पहरा फुटाएर सडक फराकिलो बनाउने कार्य जारी छ।

यस खण्डका विभिन्न स्थानमा एक हजार आठ सय ९० घनमिटर ग्याबिन जाली लगाउने, प्लम तथा कङ्क्रिट पर्खाल निर्माण गरेर सडक संरक्षण गरी करिब दुई किलोमिटर (चार हजार तीन सय ७१ घनमिटर) सडक ढलान गरिने इन्जिनियर बैठाले जानकारी दिनुभयो।

रातोपानीदेखि मुस्ताङ जिल्लाको सीमामा पर्ने काभ्रेभीरसम्मको पहिरो नियन्त्रणको काम सम्पन्न गरी स्तरोन्नतिका लागि ठेक्का व्यवस्थापनको प्रक्रिया अगाडि बढाइएको छ। म्याग्दीको अन्नपूर्ण गाउँपालिका–३ मा रहेका गुइँठेभीर, खामभित्ता लगायतका स्थानमा अहिले पहिरो नियन्त्रणको काम अन्तिम चरणमा पुगेको छ।

कमजोर भूबनोटका कारण कालीगण्डकी करिडोरको म्याग्दी खण्डमा बर्खायाममा बाढीपहिरोका कारण सिधा यातायात अवरुद्ध हुने समस्या रहेकाले सडक स्तरोन्नति तथा पहिरो नियन्त्रणलाई प्राथमिकता दिइएको आयोजनाले जनाएको छ।

Originally published on abcnews.com.np.