पोखरा । कास्कीको अन्नपूर्ण गाउँपालिकाले स्थानीय तहको संरचना पुनरावलोकन गर्दै घान्द्रुक र सल्यान क्षेत्रमा नयाँ वडा थप्ने प्रस्ताव अघि सारेको छ।

पालिका तथा वडा संरचना, सीमाना हेरफेर, वर्गीकरण र पुनरावलोकनसम्बन्धी सर्वदलीय बैठकमा स्थानीय आवश्यकता, भौगोलिक अवस्था र सेवा प्रवाहलाई प्रभावकारी बनाउने उद्देश्यसहित प्रस्तावमाथि छलफल गरिएको हो।

गाउँपालिकाले कार्यपालिकाबाट अनुमोदन गरिसकेको प्रस्तावअनुसार साविक घान्द्रुक गाविसलाई हालको २ वडाबाट ३ वडामा र साविक सल्यान गाविसलाई पनि २ वडाबाट ३ वडामा विभाजन गर्ने तयारी गरेको छ।

बैठकमा सहभागी राजनीतिक दलका प्रतिनिधिहरूले संरचनागत पुनर्संरचना स्थानीय आवश्यकताअनुसार, सर्वसम्मति र सहमतिका आधारमा गर्नुपर्नेमा जोड दिएका छन्।

अन्नपूर्ण गाउँपालिका उपाध्यक्ष चन्द्रकला देवकोटा अधिकारीले यो प्रारम्भिक प्रस्ताव मात्र भएको स्पष्ट गर्दै अन्तिम निर्णय भने संघीय सरकारले गर्ने बताइन्। उनका अनुसार वडा कार्यालयसम्म पुग्न नागरिकले भोग्दै आएको कठिनाइ र ठूलो भूगोलका कारण सेवा प्रवाह प्रभावित भएकाले वडा थप्ने प्रस्ताव अघि सारिएको हो।

गाउँपालिकाले सरोकारवाला निकायसँग समन्वय गर्दै पारदर्शी र सहभागितामूलक प्रक्रियामार्फत आवश्यक निर्णयमा पुग्ने जनाएको छ।

हाल ११ वडा रहेको अन्नपूर्ण गाउँपालिकाको क्षेत्रफल ४१७.७४ वर्ग किलोमिटर रहेको छ भने राष्ट्रिय जनगणना २०७८ अनुसार यहाँ २२ हजार ९९ जनसंख्या रहेको छ।

Originally published on abcnews.com.np.