काठमाडौं । जापानको आइची–नागोयामा हुने २०औँ एसियाली खेलकुदमा नेपालबाट २२ खेलमा १३६ खेलाडीले सहभागिता जनाउने भएका छन्।

राष्ट्रिय खेलकुद परिषद् (राखेप) अन्तर्गत खेलकुद विकास विभागका प्रमुख सरोजकुमार पोखरेलका अनुसार नेपाली टोलीमा ८० पुरुष र ५६ महिलाखेलाडी रहेका छन्। प्रतियोगिताका लागि ३२ प्रशिक्षक पनि टोलीमा समावेश हुनेछन्।

नेपालले आर्चरी, एथलेटिक्स, ब्याडमिन्टन, बक्सिङ, क्यानोइ स्लालम, क्रिकेट, साइक्लिङ, डान्स स्पोर्ट्स, गल्फ, जुडो, कबड्डी, कराते, स्केटबोर्ड, सफ्ट टेनिस, स्क्वास, पौडी, टेबलटेनिस, तेक्वान्दो, टेनिस, महिला भलिबल, कुस्ती र उसुलगायत २२ खेलमा प्रतिस्पर्धा गर्नेछ।

खेलगत सहभागिताअनुसार आर्चरीमा एक–एक पुरुष र महिला, एथलेटिक्समा चार पुरुष र दुई महिला, ब्याडमिन्टनमा दुई–दुई पुरुष तथा महिला, बक्सिङमा चार पुरुष र तीन महिला तथा क्यानोइ स्लालममा दुई पुरुष खेलाडी सहभागी हुनेछन्।

त्यसैगरी पुरुष क्रिकेट टोलीमा १५ खेलाडी, साइक्लिङमा एक–एक पुरुष तथा महिला र डान्स स्पोर्ट्समा एक पुरुष खेलाडीले प्रतिस्पर्धा गर्नेछन्।

गल्फमा तीन पुरुष र एक महिला, जुडोमा तीन–तीन पुरुष तथा महिला, कबड्डीमा १२–१२ पुरुष र महिला, करातेमा तीन पुरुष र पाँच महिला तथा स्केटबोर्डमा दुई पुरुष खेलाडीले नेपालको प्रतिनिधित्व गर्नेछन्।

सफ्ट टेनिसमा तीन पुरुष र एक महिला, स्क्वासमा एक–एक पुरुष तथा महिला, पौडीमा तीन पुरुष र दुई महिला, टेबलटेनिसमा तीन–तीन पुरुष तथा महिला, तेक्वान्दोमा दुई पुरुष, टेनिसमा तीन पुरुष र दुई महिला, महिला भलिबलमा १२, कुस्तीमा चार पुरुष र दुई महिला तथा उसुमा आठ पुरुष र तीन महिला खेलाडीले प्रतिस्पर्धा गर्नेछन्।

यसअघि चीनको हाङझाउमा सम्पन्न १९औँ एसियाली खेलकुदमा नेपालले २९ खेलमा २५३ खेलाडी सहभागी गराएको थियो। त्यसबेला १२६ पुरुष र १२७ महिला खेलाडीले प्रतिस्पर्धा गरेका थिए।

हाङझाउ एसियाली खेलकुदमा नेपालले एक रजत र एक कांस्य पदक जितेको थियो। करातेकी एरिका गुरुङले ऐतिहासिक रजत पदक जितेकी थिइन् भने महिला कबड्डी टोलीले कांस्य पदक हात पारेको थियो।

२०औँ एसियाली खेलकुद आगामी असोज ३ गतेदेखि जापानको आइची–नागोयामा सुरु हुने कार्यक्रम छ। नेपाली टोलीले अघिल्लो संस्करणको उपलब्धिलाई सुधार गर्दै थप पदक जित्ने लक्ष्यसहित प्रतियोगितामा सहभागिता जनाउने तयारी गरेको छ।

Originally published on abcnews.com.np.