काठमाडौं । नेपाली कांग्रेसका पूर्वसभापति शेरबहादुर देउवा करिब पाँच महिनापछि आज नेपाल फर्किएका छन् । सिंगापुरमा उपचार गराएर स्वदेश फर्किएका देउवालाई त्रिभुवन अन्तर्राष्ट्रिय विमानस्थलमा कांग्रेसका नेता तथा कार्यकर्ताले भव्य स्वागत गरेका छन् ।

देउवालाई स्वागत गर्न कांग्रेसको संस्थापनइतर समूहको राष्ट्रिय भेला आयोजक समितिका संयोजक डा. शशांक कोइरालाको नेतृत्वमा नेताहरू विमानस्थल पुगेका थिए । देउवा पक्षीय नेता तथा कार्यकर्ताले उनलाई विशेष सम्मानसहित स्वागत गरेका थिए ।

स्वागतका लागि पूर्वकार्यवाहक सभापति पूर्णबहादुर खड्का, प्रकाशशरण महत, एनपी साउद, विमलेन्द्र निधि, कृष्णप्रसाद सिटौला, ज्ञानेन्द्रबहादुर कार्की, मीन विश्वकर्मा, मोहनबहादुर बस्नेत, उमाकान्त चौधरीलगायतका नेता विमानस्थल पुगेका थिए ।

देउवाको स्वागतका लागि आउने नेता तथा कार्यकर्तालाई भेला हुन विमानस्थल प्रवेश गर्ने गेटअगाडिको खाली ठाउँ, नमस्ते गेटअगाडिको खाली ठाउँ र तिलगंगा आँखा अस्पतालअगाडिको खाली ठाउँ गरी तीन स्थान तोकिएको थियो ।

देउवा गत फागुन १३ गते उपचारका लागि सिंगापुर गएका थिए । उनको स्वदेश फर्किने कार्यक्रमलाई लक्षित गर्दै कांग्रेसको संस्थापनइतर समूहले नेता तथा कार्यकर्तालाई विमानस्थलमा उपस्थित हुन आह्वान गरेको थियो ।

कांग्रेस नेता मीन विश्वकर्माका अनुसार देउवालाई स्वागत गर्न करिब ७ देखि ८ हजार नेता तथा कार्यकर्ता विमानस्थल क्षेत्रमा उपस्थित भएका थिए ।

स्वास्थ्यलाभको कामना

विमानस्थलमा आयोजित स्वागत कार्यक्रममा कांग्रेस नेताहरूले देउवाको स्वास्थ्यलाभको कामना गरेका थिए ।

नेताहरूले देउवाको स्वदेश आगमनले पार्टीभित्र नयाँ ऊर्जा र सकारात्मक सन्देश थपिएको बताएका छन् । लामो समय उपचारका क्रममा विदेशमा रहेका देउवा नेपाल फर्किएसँगै कांग्रेसको आन्तरिक राजनीति र आगामी गतिविधिमा समेत चासो बढेको छ ।

Originally published on abcnews.com.np.