रोल्पा । रोल्पाको थबाङ गाउँपालिका–५ कोटलबारामा अविरल वर्षापछि आएको पहिरोले घर बगाउँदा तथा पुरिँदा तीन जनाको मृत्यु भएको छ । पहिरोमा परी नौ जना बेपत्ता भएका छन् ।

बुधबार राति करिब ८ः४० बजे पहिरो खसेको जिल्ला प्रहरी कार्यालय रोल्पाले जनाएको छ । पहिरोले स्थानीय कमलबहादुर पुन मगरको घरसहित पाँचवटा घर तथा गोठ पुरिएका छन् ।

जिल्ला प्रहरी कार्यालय रोल्पाका सूचना अधिकारी प्रहरी निरीक्षक कृष्ण श्रेष्ठका अनुसार घटनास्थलबाट दुई जनालाई गम्भीर घाइते अवस्थामा उद्धार गरिएको छ ।

हालसम्म थबाङ गाउँपालिका–५ की १८ वर्षीया शान्ती पुन मगर, ६० वर्षीय कमलबहादुर पुन मगर र ७१ वर्षीया मनरखी पुन मगरको शव फेला परेको प्रहरीले जनाएको छ ।

नौ जना अझै बेपत्ता

पहिरोमा परी नौ जना अझै बेपत्ता छन् । उनीहरूको खोजी तथा उद्धारका लागि नेपाल प्रहरी, सशस्त्र प्रहरी बल, नेपाली सेना र स्थानीयवासी परिचालन भएका छन् ।

लगातार वर्षा भइरहेकाले घटनास्थलमा उद्धार तथा खोजी कार्य चुनौतीपूर्ण बनेको प्रहरीले जनाएको छ । बेपत्ताको खोजी कार्यलाई तीव्र पारिएको छ भने घाइतेहरूको उपचारका लागि आवश्यक समन्वय भइरहेको छ ।

प्रहरीले घटनास्थलको अवस्थाबारे थप विवरण संकलन गरिरहेको जनाएको छ ।

Originally published on abcnews.com.np.