काठमाडौं । सामसङ नेपालले नयाँ पुस्ताका फोल्डेबल स्मार्टफोन तथा स्मार्टवाचसहित ग्यालेक्सी जेड सिरिज नेपालमा सार्वजनिक गरेको छ।

कम्पनीले कृत्रिम बुद्धिमत्ता, सहज प्रयोग, पहुँचयोग्यता र दिगोपनालाई केन्द्रमा राख्दै ग्यालेक्सी जेड फोल्ड ८ अल्ट्रा, ग्यालेक्सी जेड फोल्ड ८ र ग्यालेक्सी जेड फ्लिप ८ सार्वजनिक गरेको हो। नयाँ उपकरणमार्फत नेपाली उपभोक्तालाई थप सहज र कनेक्टेड प्रविधि अनुभव प्रदान गर्ने लक्ष्य राखिएको कम्पनीले जनाएको छ।

सामसङका अनुसार नयाँ फोल्डेबल उपकरणमा कृत्रिम बुद्धिमत्तामा आधारित विभिन्न सुविधा समावेश गरिएको छ। ग्यालेक्सी जेड फोल्ड ८ अल्ट्रा र जेड फोल्ड ८ मा ठूलो डिस्प्ले तथा बहुकार्यका लागि उपयोगी सुविधा उपलब्ध छन् भने जेड फ्लिप ८ ले कम्प्याक्ट स्वरूपमा फोल्डेबल अनुभव प्रदान गर्नेछ।

प्रि–अर्डरमा विभिन्न सुविधा

नयाँ उपकरणसँगै ग्राहकलाई सहज स्वामित्व अनुभव प्रदान गर्न सामसङ नेपालले किस्ताबन्दी, पुरानो उपकरण साटेर नयाँ खरिद गर्न सकिने सुविधा तथा विभिन्न पुरस्कार र सेवाको व्यवस्था गरेको जनाएको छ।

नेपालमा नयाँ ग्यालेक्सी जेड सिरिजको प्रि–अर्डर खुला गरिएको छ। अग्रिम बुकिङ गर्ने ग्राहकका लागि सीमित अवधिमा डेटा तथा अन्य सेवा, पुरानो उपकरण साट्दा थप मूल्य, एआईमा आधारित सेवा, निःशुल्क फोन कभर तथा थप वारेन्टीलगायत सुविधा उपलब्ध हुने कम्पनीले जनाएको छ।

विशेष प्रि–अर्डर प्याकेजअन्तर्गत ग्यालेक्सी जेड सिरिज खरिद गर्ने ग्राहकले साढे ४० प्रतिशतसम्म छुट तथा २४ महिनाको किस्ताबन्दी सुविधा लिन सक्नेछन्। योग्य उच्चस्तरीय ग्राहकका लागि किस्ताबन्दीमा थप सुविधा उपलब्ध हुने जनाइएको छ।

पुरानो उपकरण साट्दा थप मूल्य प्राप्त गर्न सकिने व्यवस्था पनि गरिएको कम्पनीले जनाएको छ।

डिजिटल खरिद प्रक्रिया

सामसङले डिजिटल ग्राहक पहिचान, सुविधा छनोट, अग्रिम बुकिङ, डेलिभरी र उत्पादन दर्ताजस्ता प्रक्रियालाई एकीकृत गर्ने योजना अघि सारेको छ। यसबाट ग्राहकले घरबाटै आवश्यक जानकारी लिएर उत्पादन खरिद तथा दर्ताको प्रक्रिया पूरा गर्न सक्ने कम्पनीको भनाइ छ।

कम्पनीले हिम इलेक्ट्रोनिक्स, ईसेवा, एनसेल, एपकुडो, रेमिट्यान्स साझेदार तथा अन्य संस्थासँगको सहकार्यमा वित्तीय सुविधा, सञ्चार सेवा, उपकरण साटफेर, पुरस्कार तथा ग्राहक सेवाहरूलाई एकीकृत गर्ने जनाएको छ।

दिगोपनामा जोड

सामसङले नयाँ उपकरणको स्वामित्व यात्रासँग दिगोपनालाई समेत जोडेको जनाएको छ। पुराना उपकरणको परीक्षण, मूल्याङ्कन तथा आवश्यक मर्मतपछि पुनः प्रयोगमा ल्याउने प्रक्रियामार्फत उपकरणको आयु बढाउने र विद्युतीय फोहोर घटाउने कम्पनीको योजना छ।

सामसङ नेपालका प्रबन्ध निर्देशक चाङ उक जुङले नयाँ ग्यालेक्सी जेड सिरिजको उद्देश्य नेपालमा प्रिमियम प्रविधि भित्र्याउनु मात्र नभई सम्पूर्ण स्वामित्व यात्रालाई स्मार्ट र सहज बनाउनु रहेको बताए।

उनका अनुसार पहुँचयोग्यता केवल छुटमा सीमित नभई विभिन्न सुविधा र लाभको एकीकृत संयोजन हो। त्यस्तै, दिगोपन भनेको पहिलो ग्राहकपछि पनि उत्पादनको मूल्य र उपयोगितालाई कायम राख्नु रहेको उनको भनाइ छ।

सामसङले सामाजिक उत्तरदायित्व कार्यक्रमअन्तर्गत नेपाली युवालाई कोडिङ, प्रोग्रामिङ तथा कृत्रिम बुद्धिमत्तासम्बन्धी सीप विकासमा सहयोग गर्ने जनाएको छ। कम्पनीको ‘टुगेदर फर टुमोरो, इनेबलिङ पिपल’ अभियानअन्तर्गत कार्यक्रम सञ्चालन गरिनेछ।

नेपालमा मूल्य

सामसङ नेपालले सार्वजनिक गरेको नयाँ उपकरणको मूल्य यसप्रकार छ :

• ग्यालेक्सी जेड फोल्ड ८ अल्ट्रा — रु. २ लाख ९९ हजार ९९९
• ग्यालेक्सी जेड फोल्ड ८ — रु. २ लाख ७४ हजार ९९९
• ग्यालेक्सी जेड फ्लिप ८ — रु. १ लाख ९४ हजार ९९९
• ग्यालेक्सी वाच अल्ट्रा २ — रु. १ लाख २३ हजार ९९९
• ग्यालेक्सी वाच ९ — रु. ६६ हजार ४९९

कम्पनीले नयाँ सिरिजमार्फत नेपालमा फोल्डेबल प्रविधिको नयाँ पुस्ता भित्र्याएको दाबी गरेको छ। नयाँ उपकरणलाई प्रिमियम प्रविधि, कृत्रिम बुद्धिमत्ता, सहज पहुँच, दिगोपना र ग्राहक सेवाको एकीकृत अनुभवका रूपमा प्रस्तुत गरिएको छ।

Originally published on abcnews.com.np.