काठमाडौं । नेपाली कांग्रेसका निवर्तमान सभापति तथा पूर्वप्रधानमन्त्री शेरबहादुर देउवा बिहीबार साउन २८ गते स्वदेश फर्किएका छन्। त्रिभुवन अन्तर्राष्ट्रिय विमानस्थलमा अवतरण गरेपछि देउवा सिधै चुनदेवीस्थित निवास पुगेका छन्।

असहज राजनीतिक परिस्थितिका कारण लामो समय विदेशमा रहेका देउवा सरकारका तर्फबाट स्वदेश फर्कँदा कुनै अवरोध नहुने समझदारी बनेपछि नेपाल आएको बताइएको छ। बिहीबार उनको अन्य औपचारिक कार्यक्रम भने नरहेको निकट स्रोतले जनाएको छ।

विमानस्थलमा देउवानिकट समूहको शक्ति प्रदर्शन

देउवालाई स्वागत गर्न विमानस्थलमा ठूलो संख्यामा नेता तथा कार्यकर्ता पुगेका थिए। उनीनिकट नेता–कार्यकर्ताले नाराबाजी गर्दै देउवालाई निवाससम्म पुर्‍याएका थिए।

यता, कांग्रेसको सानेपास्थित केन्द्रीय कार्यालयमा भने पार्टीको आगामी महाधिवेशन केन्द्रित बैठक चलिरहेको छ। विशेष महाधिवेशनबाट गगनकुमार थापा सभापति बनेपछि असन्तुष्ट बनेको देउवा पक्षले आफ्नो राजनीतिक गतिविधि तीव्र पार्ने तयारी गरेको छ।

देउवानिकट समूहले शुक्रबारदेखि आइतबारसम्म राष्ट्रिय भेला आयोजना गरेको छ। भेलाको संयोजन पूर्वमहामन्त्री डा. शशांक कोइरालाले गरिरहेका छन्। कोइरालाले विमानस्थलमा सञ्चारकर्मीसँग देउवा नै आफ्नो समूहको सभापति रहेको दाबी गर्दै पार्टी एकताका लागि देउवाको भूमिका महत्वपूर्ण हुने बताएका छन्। उनका अनुसार देउवाले भेलालाई सम्बोधन गर्नेछन्।

खड्का : ‘देउवा अभिभावक हुनुहुन्छ’

पूर्वकार्यवाहक सभापति पूर्णबहादुर खड्काले पनि देउवालाई कांग्रेसको अभिभावकका रूपमा चित्रण गरेका छन्।

उनले जेनजी आन्दोलनका क्रममा घाइते भएका देउवा उपचारपछि पूर्ण स्वास्थ्यलाभ गरेर स्वदेश फर्किएकोमा खुसी व्यक्त गर्दै पार्टीको सम्पूर्ण एकतामा देउवाको निर्णायक भूमिका रहने विश्वास व्यक्त गरेका छन्।

लामो उपचारपछि नेपाल फर्किए

जेनजी आन्दोलनका क्रममा २०८२ भदौ २५ गते भएको आक्रमणमा घाइते भएपछि देउवा उपचारका लागि विदेश गएका थिए। त्यसपछि उनको लामो समय विदेशमै उपचार तथा स्वास्थ्य परीक्षण भएको थियो।

पछिल्लो समय कांग्रेसभित्र नेतृत्व र अधिकारितालाई लिएर विवाद चर्किएका बेला देउवाको स्वदेश आगमन भएको हो। सर्वोच्च अदालतले कांग्रेस नेतृत्वसम्बन्धी विवादमा पुनरवलोकनको अनुमति दिएपछि देउवानिकट समूह थप उत्साहित बनेको देखिन्छ।

यसअघि देउवा दम्पती विदेशमा रहेका बेला उनीहरूविरुद्ध पक्राउ पुर्जी जारी भएको विषयसमेत सार्वजनिक भएको थियो। त्यसविरुद्ध परेको रिटमा सर्वोच्च अदालतले तत्काल पक्राउ नगर्न अन्तरिम आदेश दिएको थियो।

अब कांग्रेसमा के हुन्छ?

देउवाको स्वदेश आगमनसँगै कांग्रेसभित्रको शक्ति संघर्ष थप पेचिलो बन्ने संकेत देखिएको छ। एकातिर पार्टीको संस्थागत नेतृत्व आगामी महाधिवेशनको तयारीमा केन्द्रित छ भने अर्कोतर्फ देउवानिकट समूहले राष्ट्रिय भेला आयोजना गरेर आफ्नो राजनीतिक शक्ति प्रदर्शन गर्न लागेको छ।

त्यसैले देउवाको सक्रियता, सर्वोच्च अदालतमा विचाराधीन नेतृत्व विवाद र आगामी महाधिवेशन कांग्रेसभित्रको शक्ति समीकरण निर्धारण गर्ने प्रमुख विषय बन्ने देखिन्छ।

Originally published on abcnews.com.np.