काठमाडौं । राष्ट्रियसभामा नेपाली कम्युनिस्ट पार्टी (नेकपा)की सांसद रेणु चन्दले वर्तमान सरकारको कार्यशैली र कार्यक्षमतामाथि प्रश्न उठाएकी छन्। सरकार गठन भएको चार महिना बितिसक्दा पनि जनअपेक्षाअनुसार काम गर्न नसकेको भन्दै उनले सरकारको आलोचना गरेकी हुन्।

बिहीबार राष्ट्रियसभा बैठकमा बोल्दै सांसद चन्दले सरकारले पूरा गर्न नसकिने आश्वासन बाँडेको आरोप लगाइन्। उनले स्वास्थ्य बिमा, केदारनाथ पराजुली दम्पतीको आत्मदह (जलसमाधि) लगायतका गम्भीर विषयमा सरकारको ध्यानाकर्षण गराइन्।

“१०० दिनमा युवाहरूलाई स्वदेश फर्काउने र रोजगारी दिने भनिएको थियो, तर परिणाम शून्य छ। दरबार हत्याकाण्डदेखि निर्मला पन्त प्रकरणसम्मका मुद्दा चुट्कीको भरमा समाधान गर्छौं भन्नेहरूले अहिले के गरिरहेका छन् ?” भन्दै उनले सरकारसँग प्रश्न गरिन्।

सरकारले आफ्ना कमजोरी लुकाउन विगतका सरकारलाई दोष दिएर उम्कन नमिल्ने उनको भनाइ थियो। जनतालाई प्रश्न गर्दा उल्टै हप्काउने प्रवृत्ति देखिएको आरोप लगाउँदै उनले भनिन्, “तपाईंहरूको असक्षमताको भारी हामी बोक्दैनौँ।”

सांसद चन्दले आधारभूत आवश्यकताका वस्तुसमेत सहज रूपमा उपलब्ध गराउन नसक्ने सरकारले विगतको ३५ वर्षको हिसाब माग्नुको नैतिक आधारमाथि समेत प्रश्न उठाइन्।

“जनतालाई आधा सिलिन्डर ग्यास दिन नसक्नेले कुन नैतिकताले हामीसँग ३५ वर्षको हिसाब माग्छ, यही ताजुबको कुरा भइसकेको छ,” उनले भनिन्।

उनले जनताका आधारभूत समस्या समाधान गर्न सरकार गम्भीर बन्नुपर्ने र जनताले उठाएका प्रश्नबाट विचलित नभई जिम्मेवार ढंगले काम गर्न आग्रह गरिन्।

Originally published on abcnews.com.np.