रुकुमपश्चिम । लगातारको वर्षाका कारण पहिरो खसेर अवरुद्ध बनेको मध्यपहाडी राजमार्गअन्तर्गत रुकुम–बागलुङ सडकखण्ड बिहीबार बिहानदेखि पुनः सञ्चालनमा आएको छ।

रुकुमपूर्वका प्रमुख जिल्ला अधिकारी कोपिला राईका अनुसार बुधबार साँझदेखि अवरुद्ध सडक बिहीबार बिहान ११ बजेदेखि यातायातका लागि खुलाइएको हो। बिहान ६ बजेदेखि सुरक्षा निकाय, स्थानीय प्रशासन र स्थानीय तहको समन्वयमा पहिरो पन्छाउने काम तीव्र पारिएको थियो।

प्रमुख जिल्ला अधिकारी राईसहित सुरक्षा निकायका प्रमुखहरू घटनास्थलमै पुगेर अवरोध हटाउने कार्यको समन्वय गरेका थिए। स्थानीय प्रशासन, नेपाल प्रहरी, नेपाली सेना, सशस्त्र प्रहरी बल तथा सम्बन्धित स्थानीय तहको सक्रियतामा पहिरो हटाएपछि सडक सञ्चालनमा ल्याइएको हो।

भूमे गाउँपालिका–५ स्थित धौलापहिरो र वडा नम्बर ४ को काँडाबगरलगायत क्षेत्रमा पहिरो खसेपछि मध्यपहाडी राजमार्ग पूर्ण रूपमा अवरुद्ध भएको थियो। पहिरोका कारण सडकमा सवारीसाधन रोकिँदा यात्रुहरू बाटोमै अलपत्र परेका थिए।

जिल्ला प्रहरी कार्यालयका प्रहरी नायब उपरीक्षक (डीएसपी) खुमानन्द पाण्डेका अनुसार अहिले सडकमा यातायात सञ्चालनमा आए पनि जोखिम भने पूर्ण रूपमा हटेको छैन।

लगातार वर्षा भइरहेकाले पहिरो गएको स्थानको माथिल्लो भागबाट गेग्रानसहित थप पहिरो खस्ने सम्भावना रहेको प्रहरीले जनाएको छ। त्यसैले मध्यपहाडी राजमार्ग भएर यात्रा गर्ने यात्रुलाई सडकको अवस्था बुझेर तथा आवश्यक सावधानी अपनाएर मात्र यात्रा गर्न प्रहरीले आग्रह गरेको छ।

सडक खुलेसँगै पहिरोका कारण रोकिएका सवारीसाधन गन्तव्यतर्फ लाग्न थालेका छन्। रुकुमपश्चिमबाट रुकुमपूर्व हुँदै बागलुङ, पोखरा र काठमाडौं जाने तथा मध्यपहाडी राजमार्ग हुँदै रुकुमतर्फ आउने सवारीसाधनसमेत सञ्चालनमा आएका छन्।

यद्यपि वर्षा निरन्तर भइरहेकाले सडकको अवस्था जुनसुकै बेला प्रभावित हुन सक्ने भन्दै प्रशासन र प्रहरीले यात्रुलाई अनावश्यक जोखिम नलिन आग्रह गरेको छ।

Originally published on abcnews.com.np.