काठमाडौं । पत्रकार तथा जनआस्था साप्ताहिकका सम्पादक किशोर श्रेष्ठ पक्राउ परेको घटनाप्रति प्रेस काउन्सिल नेपालले गम्भीर ध्यानाकर्षण जनाएको छ। काउन्सिलले बिहीबार विज्ञप्ति जारी गर्दै मिडिया र पत्रकारले आचारसंहिता उल्लंघन गरे उजुरी गर्ने कानुनी निकाय आफू रहेको स्मरण गराएको छ।

आस्था मिडियाका अध्यक्ष तथा जनआस्थाका सम्पादक श्रेष्ठलाई बुधबार राति पक्राउ गरिनुका साथै उहाँको निजी निवासमा खानतलासी गरिएको र बिहीबार बिहान सञ्चारमाध्यमको कार्यालयमा सुरक्षाकर्मी प्रवेश गरी कम्प्युटरलगायत सामग्री जफत गरिएको घटनाबारे काउन्सिलले चासो व्यक्त गरेको हो।

प्रेस स्वतन्त्रताको सम्मान आवश्यक

प्रेस तथा अभिव्यक्ति स्वतन्त्रता नागरिकको सूचनाको हक सुनिश्चित गर्ने आधार भएको उल्लेख गर्दै काउन्सिलले यसको मर्यादा र सम्मान कायम राख्नु सबै पक्षको साझा दायित्व भएको जनाएको छ।

विज्ञप्तिमा भनिएको छ, “प्रेस स्वतन्त्रताको सदुपयोग र सम्मान हुनुपर्दछ। काउन्सिल सञ्चारकर्मको क्रममा पत्रकार तथा सञ्चारकर्मीको कार्यशैली, व्यवहार, पेसागत मर्यादा र आचरणप्रति पनि उत्तिकै संवेदनशील र चिन्तित छ।”

काउन्सिलले प्रेस स्वतन्त्रताको प्रयोगका नाममा हुन सक्ने स्वच्छन्दताप्रति पनि पत्रकार तथा सञ्चारकर्मी सचेत हुनुपर्ने जनाएको छ।

आचारसंहिता उल्लंघनमा काउन्सिलमा उजुरी गर्न आग्रह

मिडिया तथा पत्रकारले आचारसंहिता उल्लंघन गरेको अवस्थामा त्यससम्बन्धी उजुरी गर्ने अधिकारप्राप्त निकाय प्रेस काउन्सिल नेपाल नै रहेको काउन्सिलले स्पष्ट पारेको छ।

काउन्सिलले प्रेस स्वतन्त्रताको दुरुपयोग हुन नदिन सबै पक्षलाई जिम्मेवार र संवेदनशील बन्न आग्रह गर्दै प्रचलित कानुनी व्यवस्थाको पालना गर्न पनि ध्यानाकर्षण गराएको छ।

Originally published on abcnews.com.np.