काठमाडौं । नेपाली कांग्रेसले आगामी भदौ ११ गते महिला उद्यमशीलता सम्मेलन आयोजना गर्ने भएको छ। बिहीबार बसेको कांग्रेस केन्द्रीय नीति, अनुसन्धान तथा प्रशिक्षण प्रतिष्ठानको सातौँ बैठकले सम्मेलन आयोजना गर्ने निर्णय गरेको हो।

सम्मेलनमा स्टार्टअप तथा साना र मझौला उद्यममा संलग्न महिला उद्यमीहरूको सहभागिता रहनेछ।

पार्टी उपसभापति तथा प्रतिष्ठान प्रमुख विश्वप्रकाश शर्माका अनुसार महिला उद्यमीलाई एउटै मञ्चमा ल्याएर अनुभव आदानप्रदान, लगानीकर्तासँग भेटघाट, सरकारी निकायसँग समन्वय तथा नयाँ बजारको खोजीका लागि सम्मेलन आयोजना गर्न लागिएको हो। सम्मेलनले महिला उद्यमीलाई थप प्रेरणा र अवसर सिर्जना गर्ने अपेक्षा गरिएको उनले बताए।

ग्रीन रन पुनः आयोजना हुने

बैठकले बीपी स्मृति दिवसका अवसरमा गत साउन ६ गते आयोजना गरिएको ग्रीन रन प्रतियोगिताअन्तर्गत महिला दौड भदौ ६ गते पुनः सञ्चालन गर्ने निर्णयसमेत गरेको छ।

कांग्रेसका कार्यवाहक मुख्यसचिव कृष्णप्रसाद दुलालका अनुसार अघिल्लो पटक प्राविधिक कारणले महिला दौडका प्रतियोगीको विजेता घोषणा गर्न नसकिएकाले पुनः प्रतियोगिता आयोजना गर्न लागिएको हो।

समुदाय पहुँच उपसमिति गठन

बैठकले प्रतिष्ठानका सदस्य राकेश सिंहको संयोजकत्वमा समुदाय पहुँच उपसमिति गठन गरेको छ। केन्द्रीय सदस्य डा. अमिता प्रधानलाई उपसमितिको संयोजक बनाइएको जनाइएको छ।

प्रतिष्ठानको अर्को बैठक भदौको पहिलो साता बस्नेछ।

Originally published on abcnews.com.np.