विराटनगर । कोसी प्रदेशका मुख्यमन्त्री हिक्मतकुमार कार्कीले प्रदेश सरकारमा सहभागी नेपाली कांग्रेसका मन्त्रीहरूको राजीनामा स्वीकृत गर्दै कांग्रेसले प्रदेश सरकारलाई गरेको योगदान र सहकार्यप्रति धन्यवाद तथा आभार व्यक्त गरेका छन्।

कांग्रेसबाट सहभागी मन्त्रीहरूको राजीनामा स्वीकृत गरेपछि मुख्यमन्त्री कार्कीले प्रदेशको विकास, समृद्धि र सुशासनका लागि कांग्रेससँगको सहकार्य महत्वपूर्ण रहेको बताएका हुन्।

उनले कांग्रेससँगको सहकार्य सुमधुर र सकारात्मक रहेको उल्लेख गर्दै भने, “कांग्रेससँगको सहकार्य सुमधुर र अत्यन्तै सकारात्मक रह्यो। यो मेरो लागि महत्वपूर्ण विषय हो।”

मुख्यमन्त्री कार्कीले आगामी दिनमा पनि प्रदेशको विकास र समृद्धिका लागि कांग्रेसबाट निरन्तर सहयोग र सहकार्य प्राप्त हुने विश्वास व्यक्त गरे। संघीय लोकतान्त्रिक गणतन्त्रको रक्षा, सुदृढीकरण र संस्थागत विकासका लागि पनि कांग्रेससँग आगामी दिनमा हातेमालो गर्दै अघि बढ्ने उनले बताए।

रिक्त मन्त्रालय मुख्यमन्त्रीकै जिम्मामा

कांग्रेसका मन्त्रीहरूले राजीनामा दिएपछि रिक्त भएका मन्त्रालयको जिम्मेवारी तत्कालका लागि मुख्यमन्त्री कार्कीले आफैँसँग राखेका छन्।

कोसी प्रदेश सरकारमा नेपाली कांग्रेसबाट एक राज्यमन्त्रीसहित पाँच जना मन्त्री सहभागी थिए। कांग्रेसका मन्त्रीहरूको बहिर्गमनसँगै रिक्त मन्त्रालयमा नयाँ मन्त्री नियुक्त गर्ने गरी मन्त्रिमण्डल पुनर्गठनको तयारी भइरहेको मुख्यमन्त्री तथा मन्त्रिपरिषद्को कार्यालयले जनाएको छ।

मन्त्रिमण्डल चाँडै पुनर्गठन गरिने कार्यालयको भनाइ छ।

Originally published on abcnews.com.np.