दमौली । अर्थमन्त्री डा. स्वर्णिम वाग्लेले जनताका आधारभूत आवश्यकता पूरा गर्न सरकार प्रतिबद्ध रहेको बताएका छन् ।

तनहुँको व्यास नगरपालिका–१० दुम्सीमा बिहीबार मतदातासँगको भेटघाटमा बोल्दै मन्त्री वाग्लेले सीमित स्रोतसाधनका बीच जनताका अपेक्षा पूरा गर्न सरकार क्रियाशील रहेको बताए ।

उनले बजेटको सीमा भए पनि खानेपानी, सडक, विद्यालय, स्वास्थ्यचौकी, तटबन्धन तथा खेलमैदानजस्ता आधारभूत आवश्यकतालाई प्राथमिकतामा राखेर काम भइरहेको बताए ।

“बजेटका सीमाहरू छन्, रकम थोरै छ । जनताका अपेक्षा धेरै छन् । जुन बस्तीमा पुगे पनि जनताले खानेपानी, सडक, विद्यालय, स्वास्थ्यचौकी, तटबन्धन, खेलमैदानका माग गर्नुहुन्छ । सरकारले सक्दो त्यसलाई सम्बोधन गर्न प्रयास गरिरहेको छ,” उनले भने ।

मन्त्री वाग्लेले तनहुँको विकासका लागि आफू प्रतिबद्ध रहेको बताउँदै यसपटकको बजेट वितरणमा न्यायोचित बनाउन पहल गरिएको जानकारी दिए ।

तनहुँका जनताले आफूलाई दुई पटक प्रतिनिधिसभा सदस्यमा निर्वाचित गराएको स्मरण गर्दै उनले जिल्लावासीले लगाएको गुन र ऋण कहिल्यै नबिर्सने बताए ।

दुम्सीका स्थानीयले खानेपानी र तटबन्धनको समस्या राखेपछि मन्त्री वाग्लेले सम्बन्धित मन्त्रालयसँग छलफल गरी काम अघि बढाउने प्रतिबद्धता जनाए ।

स्थानीयवासीका अनुसार दुम्सीका करिब पाँच सय घरधुरीमा खानेपानीको समस्या छ । उनीहरूले डुबानको जोखिम न्यूनीकरणका लागि तटबन्धन निर्माण गर्नसमेत माग गरेका छन् ।

Originally published on abcnews.com.np.