काठमाडौं । नेपाली कांग्रेसको इतर पक्षले पार्टीका पूर्वसभापति शेरबहादुर देउवालाई बूढानीलकण्ठस्थित चुनदेवी कार्यालयमा पार्टी सभापतिकै रूपमा स्वागत गरेको छ ।

बिहीबार पाँच महिनापछि उपचार सकेर स्वदेश फर्किनुभएका देउवालाई इतर पक्षले शुक्रबार चुनदेवीस्थित सम्पर्क कार्यालयमा स्वागत गरेको हो ।

कार्यालयमा देउवाका लागि तयार पारिएको कार्यकक्ष तथा टेबुलमा ‘सभापति’ लेखिएको नेमप्लेटसमेत राखिएको छ । यससँगै कांग्रेसभित्रको आन्तरिक शक्ति संघर्ष थप सतहमा आएको देखिएको छ ।

गत वर्ष भदौ २४ गते भएको जेनजी आन्दोलनका क्रममा कुटपिटबाट घाइते भएपछि देउवा उपचारका लागि विदेश जानुभएको थियो । करिब पाँच महिनाको उपचारपछि उहाँ बिहीबार नेपाल फर्किनुभएको हो ।

यसैबीच, कांग्रेसको इतर पक्षले शुक्रबारदेखि तीनदिने राष्ट्रिय भेला आयोजना गरेको छ । भेलामा देउवाले प्रमुख अतिथिका रूपमा सम्बोधन गर्ने कार्यक्रम रहेको छ ।

राष्ट्रिय भेलाको आयोजक समितिको संयोजकमा कांग्रेस नेता डा. शशांक कोइराला रहनुभएको छ ।

देउवालाई इतर पक्षले पार्टी सभापतिको हैसियतमा स्वागत गर्नु र उहाँका लागि ‘सभापति’ नेमप्लेट राखिनुले कांग्रेसभित्र नेतृत्वलाई लिएर जारी विवादलाई थप पेचिलो बनाउने संकेत गरेको छ ।

Originally published on abcnews.com.np.